Fiinna juoiganveršuvdna «The Voice» prográmmas
Dieđut – Juoiganjietna
- Juoigalasat Searvi galgá ovddidit árbevirolaš juoigama. - Juoiganjietna lea proseakta man searvi lágida ovddidan dihte árbevirolaš juoigama.
- Searvvis leat miellhtut miehtá Sámi.
Ovddit lávvordaga lágidii Juoigalasat searvi juoigangilvvu man sii gohčodit «Juoiganjietna», seamma sulaid go «The Voice». Olu oassálastit ja dievva viessu dahke fiinna ja intiima lágideami.
Ulbmil dainna lea ovddidit juoigama kulturárbin, ja oažžut ođđa ja amas juigiid lávdái. Kárášjogas ledje ge sii ovttas hárjánan juigiiguin.
Ođđa konseapta
Dát lea oalle ođđa konseapta, muhto doallá buori dási álkes scenografiijain mii lea heivehuvvon unnit ja intiima lávdái, čeahpes láidesteaddjit ja erenoamážit ollu čeahpes juoigit goappaš sohkabealis. Ja olles gilvu streamejuvvui njuolga neahta bokte.
– Mii diehtit ahte Sámis leat ollu čeahpes juoigit geat eai leat goassege leamaš lávddis dahje gullon almmolaččat, ja ahte lea šállošahtti go dat juoigit eai leat leamaš lávddis ovdal. Juoiganjietna lea dárbbašlaš sidjiide ja unnit lávddiide, juoga mii min mielas váilu. Danin mii háliidit ovddidit dán konseapta, muitala okta lágideaddjiin, Ellen J. Sara Eira.
Vuittii boarráseamos nieidda luđiin
Ieš gilvu ii bistán beare guhká. Go juoigit ledje leamaš lávddis, de manne duopmárat digaštallat, ja dan botta guoimmuhedje čeahpes juoigit.
Go duopmárat ledje muhtun áigge, de bohte sii ruovttoluotta, ja de beasai ge jury njunuš, Inga Berit Sara Sara Sara, almmuhit ahte eahkeda buoremus juoigi lea Ánne Helene Eira Persen, gii lea eret Mázes, ja gii ássá Kárášjogas, iežas boarráseamos nieidda, Lise Mariell, luđiin. Dasto čuovuiga Terje Henriksen Joks ja Per Bueng boahttevaš sajiin. Ledje ge oktiibuot 13 juoigi.
– Gal dat lei nu somá vuoitit iežan nieidda čáppa luđiin, nu ahte dál galgá ávvuduvvot, muitala Ánne Helene maŋŋel bálkkašumi geigema.
Maiddái su eadni lei duhtavaš. – Dieđusge. Lean maid hirpmástuvvan go guovttis mu mánáin juoigaba ja leaba nu čeahpit doalahit dán árbevieru, go mun maid juoiggan, mojohallá Berit Anne Eira.
Máŋggabealálaš prográmma
Dan maŋŋe lei rabas mikrovdna juigiide geat háliidedje juoiggastit, ja konsearta Johan Mikkel «Elvis» Utsiin, mii lei bivnnut. Geahččit besse lávllodit mielde, go su dovdomearka lea áđestallat Elvisa, juoga maid sullii 30 jagi lea dahkan. Go son lávllui iežas lávlagiid, de ledje maid «fanssat» geat ledje hárjehallan synkroniserejuvvon dánssa su dovdoseamos lávlagiidda. Naba luohti? Dat dieđusge gullui gitta idjii, go luohti han rievtti mielde ii goassege noga.
Lágideaddjit ledje maid hui movttegat.
– Mii leat hui duhtavaččat. Lei hui somás eahket, mas lei hirbmat buorre vuoigŋa, maiddái lea hui somá gullat ollu dovddus olbmuid ja maid muhtimiid geat eai nu bearehaga beaggán, juoigat árbevirolaš luđiid midjiide buohkaide geat vuolgán boahtán dan gullat, nu ahte dál šaddá erenoamáš buorre vuoiŋŋastit maŋŋel dán fiinna lágideami, muitala Ellen J. Sara Eira maŋŋit eahkedis.
Johan Mathis Gaup