Allaárvosaš skeaŋka Guovdageainnu skuvlii
Musihkkarusttegat ja čuojanasat galget rahpat eambbo vejolašvuođaid skuvlla musihkkaoahpahusas.
Lounge Sámi ovddasteaddjit skeŋkejedje musihkkarusttegiid ja čuojanasaid Guovdageainnu skuvlii.
51 000 ruvdnosaš skeaŋka skuvlii
Lounge Sápmi lágidii juovlakonsearta ovdal juovllaid Guovdageainnus, man oktavuođas dinejedje 51 000 ruvnno bileahtaiguin. Sii ledje mearridan ahte dainna ruđain maid juovlakonsearttas dinejit, dainna galget oastit skuvlii musihkkarusttegiid ja čuojanasaid.
Dainna ruđain leat dál oastán Pa-arusttega, miksenbeavddi, gitára, bássa, rumbbuid ja veahá kábeliid maid háliidedje skuvlii skeŋket. Dasa lassin adde maiddái moadde mikrofovnna.
– Dat galget sávvamis adnot musihkkaoahpahusas dáppe skuvllas. Sávvamis sáhttá dát maid leat dakkár smávva motivašuvdna, ahte čuojahišgohtet eambbo, dadjá Anthoni Haetta.
Haetta muitala iežaset kulturskuvlla bokte doallan bándadiimmuid ja sávvá ahte šaddá eambbo sihke skuvllas ja kulturskuvllas, vai leat eambbo vejolašvuođat čuojahit iešguđetlágan čuojanasaiguin.
Sus lea maid jáhkku ahte mánáin ja nuorain lea, dahje sáhttá šaddat, beroštupmi čuojahit jus sii fal ožžot fálaldaga ja vejolašvuođa.
– Mearkkaša goit ahte dál lea skuvllas vuođđu ja vuolggasadji doallat veahá viiddiduvvon musihkkadiimmuid main lea eambbo fokus čuojanasaide iige dušše gitárii ja lávlumii dahje juoigamii. De sáhttet leat vejolašvuođat čuojahit rumbbuiguin dahje oahppat gieđahallat bássa.
Anthoni Haettas lei vel sávaldat Lounge Sámi bealis mánáide ja nuoraide geat ledje skuvllas:
– Mii sávvat ahte dát skeaŋka galgá movttiidahttit din čuojahit eambbo. Dáppe soitet ođđa joavkkut sáhttit boahtit, ođđa sámi pop-, rock- dahje punk-joavkkut. Mii sávvat goit ahte dáid galgabehtet dii atnit, dajai son sidjiide.
– Mii leat hui, hui giitevaččat
Skuvlla bealis lei doaibmi rektor, Ellen J. Sara Eira, giitiime dan golbmasa skeaŋkka ovddas.
Son álggahii ge iežas sártni ná: – Lea hui somá mii dál galgá dáhpáhuvvat.
Son jotkkii:
– Mii leat ožžon hirbmat buori, stuora skeaŋkka mas lea alla árvu ja mii ii livčče vejolaš sin golbmasa haga ja dan barggu haga maid sii leat dahkan. Dan ovddas mii leat hui, hui giitevaččat. Mearkkaša hui olu min skuvlii go mii dákkár skeaŋkka oažžut. Oktii vel, hui olu giitu.