Veahkkin ođđa beanavuoddjái
Beakkán Finnmarksløpet beanavuodjingilvvu veterána, 62-jahkásaš Inger-marie Haaland, muitala son lea dán jagi rookie Henrik Bøe handler dahje veahki FL-600 km.
– Son gilvala vuosttaš geardde Finnmarksløpet gilvvus. Henrik lea hirbmat várrogasat vuodján beanaráiddu, muitala Inger-marie Haaland.
Ávvir lei báikkis go Bøe joavddaid Kárášjohkii maŋŋebárgga.
– Bohten áiddo, ferten vieččastit beatnagiidda čázi, lohká son ja doapmala viežžat čázi ja váldá mielde borramuša maid handler lea hoigalan gilvaleaddjiid beallái šiljus.
– Henrik lea vuodján várrogasat, lea diktán beatnagiid vuoiŋŋastit. Ikte go Henrik bođii Leavvajohkii, de lei oalát njuoskan
soavlli dihtii. Mannan ija ledje buollašat ja jáhkkimis leamaš láhttu buorre. Ii olmmoš daga maidege dálkkiin ja siivvuin. Henrik guđii ovtta beatnaga Guovdageainnus juo ja sus lea ain dat čieža beatnaga, muitala nubbi handler Bård Lien.
– Dáid beatnagiid leat mii bures hárjehallan, 500 miilla jáhkán mun borgemánu rájes. Mii hárjehat beatnagiid Torpa guovllus ja Hardangerduoddaris. Muhto man bures Henrik Bøe lea hárjehallan, dan in dieđe, čaibmá Inger-marie Haaland gii vuittii 2009 FL-1000 km vuosttaš nissonolmmožin ja 2012 fas vuittii nuppi golli ja nu maid NM guhkes gaska beanavuodjima dan jagi.
Henrik Bøe gii lea dollačáskadeaddji Kolbotn báikkis ja bargá vuoruid mield muitalii ahte son lea buori vuoimmis.
– Lean gal váiban dál, lean hui čuorbi vuoiŋŋastit. Ádjánan ovdalgo jaskkodan. Dát lea munnje stuorra vásáhus, lohká son.
Joatkimin Áltái
Kárášjogas fertejit buot beanavuoddjit vuoiŋŋastit guhtta tiimmu. Nuppe beale šiljus lea nummar 162 Jørn Johannesen ráhkkaneamen vuoddját. Oidno vácciheamen beatnagiid vai lađđasat fas doibmet ja dasto oidno son dárkkisteamen ahte buot maid dárbbaša Kárášjoga ja Álttá gaskka lea fárus.
– Jørn lea norgalaš, muhto ássá dál Ruoŧas. Sus lea fárus guhtta beatnaga, muitala ruoŧŧelaš Frans Forsberg ja lohká beanavuoddjit dárbbašit veahkki.
Lohká lea goalmmát jahki go son lea handler, iige son láve beanaráidduin vuoddjit.
– Vuosttaš beanavuodjingilvu mas Jørn lei mielde, gilvalii 1985:s guhkes gaskka vuoddjimis, ja dasto vujii 15 jagi turisttaid ja dál lea fas gilvaleamen. Mu mielas lea hirbmat somá bargat handlerin, muhto lea maid olu bargu. Mun vuojan biilla ja fuolahan buot bargguid bisánan báikkiid gaskka.
Tiibmu 11.00 beassá vuoddját, muitala Frans Forsberg.
Stuorra oránša biktasiiguin dopmet šibitdoaktárat iešguđet beanaráidduid guvlui, dárkkistit ja jotket.
– Lea stuorra bargu lágidit
Finnmarksløpet beanavuodjingilvvu, lohká Frans Forsberg ja rábmo gilvvu.