Gáhtaša gákti ii guhko
Dieđát go makkár diiddat lea čadnon čiŋadeapmái ja messostallamii? Dan birra lea Ávvira Live-podkásttas dáid beassážiid.
Dát studiosátta Ávviris filbmejuvvo ja sáddejuvvo skilleduorastaga diibmu 18.00 Lávvulávddis Guovdageainnus. Dat bistá sullii diimmu, ja dohko sáhttet olbmot maid mannat geahččin ja guldaleaddjin.
– Áigut hupmat veahá vieruid birra mat ledje ovdalaš áigge ja mat leat ain dán áigge, vieruid mat leat čadnon messostallamii, ovttastallamii ja beassážiidda. Šaddá dieđusge sáhka čiŋadanvieruin ja daidda leat čadnon iešguđet diiddat, dadjá Iselin Skum, gii lea dat nubbi prográmmajođiheaddji Ávviris dán live-podkásttas.
– Ja go lea sáhka ovdalaš áigge vieruin, ja de sáhttá jearrat guhkku go gáhtaša gákti vel dán áigge ge, 2024:s, lasiha Inger Marita Bals, gii lea Ávvira nubbi prográmmajođiheaddji dán sáddagis.
Gehppes ságastallan
Diibmá lea Ávviris vuosttaš geardde dákkár sátta, mas fáddán ledje irggástallanvuogit. Soai leaba jurddašan dán jagi maid lágidit dušše dakkár gehppes ságastallama. Ii leat makkárge čiekŋalis, duođalaš ságastallan, muhto humadit dušše vehá dáid fáttáid birra.
Ja fáddá lea oalle áigeguovdil beassážiid áigge, go dál han lea alimus čiŋadan- ja messostallanáigi.
– Makkár diiddat sáhttet leat čadnon meassuide? Leat go ovdamearkkat?
– Čiŋat sáhttet geažuhit vissis áššiid, ovdamearkka dihte go nissonolbmos liidni lea šaddan botnjut, movt de manná. Ja lea go nu ahte jus lebbe alit liinni heajaide, de lea vuosteolmmoš? Nabai jus ruoná liinni lebbe, lea go dat balahahkes olbmo liidni, vai movt dat lea? Ja movt de jus lebbe fiskes liinni, dál go dat ivdni orru hui bivnnut, jearraba soai.
Eaba almmut vel gussiid
Inger Marit ja Iselin leaba maiddái dán jagi bovdeme gussiid iežaska studioi Lávvulávddis.
Muhto eaba soai háliit vuos muitalit juste geat dat bohtet sudnuide guossin.
– Ean moai diibmá ge almmuhan gussiid namaid ovdagihtii, muhto letne bovden moadde heivvolaš guossi. Sii dat leat dat «fágačeahpit». Šaddá goit hui miellagiddevaš humadit dán fáttá birra, dadjá Iselin Skum.