Šuvihii tiibmabeale ovdal
Hammerfest Skiklubb čuoigi, 17-jahkásaš Emil Reite, orui leamen dego sierra luohkás gilvaleamen, go šuvihii rastá moallasárgá tiibmabeale ovdal nuppi falimusa, Simen Vars-larsstuen, gii ovddasta Kvaløysletta Skilag. Goalmmádin mollii lei Guovdageainnu čuoigansearvvi čuoigi, Lea-christine Henriksdatter Sara, measta minuhta su maŋŋelis.
Vaikko gilvvu buot 16 gilvaleaddji ledje oktanaga čuoigalan, de joavddai Emil Reite birrasii 15 minuhta ovdal sin Guorpmehii, gos láhttu jorggihii ruovttuguvlui. Nummar 46 Simen Vars-larsstuen, nummar 58 Lea-christine Henriksdatter Sara ja nummar 43 Jonas Hellesjø bohte ovtta fáru 15 minuhta maŋŋelis Emil Reite. Moalas lei gaska lassánan tiibmabeliin ja Emil vuoitoáigi lea 1:51:40.
– Mun ledjen mearridan ahte galggan čuoigat nu johtilit go nagodan. Lean duhtavaš otná leavttuin. Lean dál beassášluomus ruovttus Hámmerfeasttas. Go fuomášeimmet ahte Kárášjogas leat čuoigamat, de doapmaleimmet dieđihit iežamet gilvui go ferte čuoigamiid doarjut. Dađi bahábut eai lágiduvvo nu olu čuoigamat šat eambbo! Eai leat šat nu olusat geat gillejit čuoigat gilvvu ja čuoigiid lohku lea mealgat njiedjan. Ferte doarjut daid čuoigamiid mat ain lágiduvvojit, lohká Emil Reite.
Ii dáidde leat imaš ahte Emil Reite lei vuosttaš, gii joavddai mollii, go son han vuittii bronssa 15 kilomehtera Norggacup finálačuoigamis, klassihkalaš oktanaga čuoigaleamis. 17-jahkásaš Emil Reite vázzá dál Norges Toppidrettsgymnas (NTG) joatkkaskuvllas Lillehammer gávpogis.
Kárášjogas lei beassášlávvardaga birrasii 0-4 gráda buolaš. Leamaš guhká cuoŋu, muhto mannan ija luoitilii veaháš vaza láhttui, nu ahte šattai veaháš sabádat.
Doarredan bures
Mollii lei Emil addán dan maid nagodii ja gilvaleaddjit ledje báhcán mealgat su maŋŋái. Simen Vars-larsstuen, A19-20 luohkás, šuvihii meattá earáid ja lei nubbin
mollii, 2:23:36. Goalmmádin mollii lei Lea-christine Henriksdatter Sara, N 17-18 luohkás, áiggiin 2:24:32. Njealjádin lei Jonas Hellesjø, A31-40 luohkás, áiggiin 2:25:53. Dát njealjis ledje iežaset luohká buoremus čuoigit ja olahedje golli.
Mánáidluohkás hirpmástuhtii. Ráissa, Nordreisa idrettslag nuorra čuoigi, Nils Even Eriksen, A1316 11 km čuoigamis áiggiin 33:05. Eambbo bohtosiid gávdná dás, oza čuoigamiid Karasjokrennet namain: eqtiming.no
– Ledje hui fiinna láhtut, lei lossat čuoigat. Mun ožžon buori sealggi gean bessen doarredit, lei Siman Vars-larsstuena kommentára, ja su mun čuvvon measta deike, fertejin luoitit dan Givdovári lahka. Mun láven gilvvohallat čuoigamiin juohke vahkkoloahpa, diekkár Norggameašttirgilvvuin. Mun váccán Ráissa joatkkaskuvlla, váccán čuoigansuorggi ja hárjehalan dálvvi. Ledje hui buorit čuoigamat. Álggos láhttus ledje olu vuostálaga, das maŋŋá ledje njuolgga fiinna láhtut ja maŋimuš oassi ledje eanaš mihtolagaid. Jáhkán dat lei buoremus, muitala Lea-christine Henriksdatter Sara.
Maiddái Jonas Hellesjø mielas, nummar 43, eret Aurskog-hølandas, ledje buorit čuoigamat. Muitala Givdovári buohta ii nagodan šat doarredit daid nuoraid čuoigiid. Rábmui láhtu ja čuoigamiid lágideami.
Oasseváldiid lohku lassánan
Nordlys valáštallansearvvi čuoiganjoavkku jođiheaddji Ellen Inga Haetta Norvang muitala, ahte dán jagi ledje veaháš eanet oasseváldit go ovddit jagiid. Kárášjoga čuoigamat
leat lágiduvvon 56 geardde ja vuosttaš jagiid manai láhttu Váljogas Kárášjohkii. Maŋimuš jagiid lea láhttu biddjon Niitohárjji šiljus Kárášjogas gitta Guorpmehii ja ruovttoluotta. Vuosttaš jagiid lágidedje čuoigamiid beassášlávvardaga, muhto stuorra čuoigamiid várás, maŋidedje Kárášjoga čuoigamiid vahkuin ja dalle njiejai
oassálastinlohku.
– Lea sihkkarit go sirddiimet čuoigamiid beassášlávvardahkii fas. Nordlys lea mearridan ahte Kárášjoga čuoigamat galget leat beassášlávvardaga, lohká Norvang.
50. geardde Kárášjoga čuoigamat
Jan Amundsen lea aiddo joavdan
Kárášjohkii fas, son lea čuoigan trimluohká ja čuoigalan árrat.
– Lean ássan Hámmárfeasttas guhká. Dál lean fárren Kárášjohkii. Lei buorre siivu, veaháš sabádat ja geamádat. Eai leat šat nu olu čuoigit. Dán jagi lea 50. geardde go čuoiggan Kárášjoga čuoigamiid. Vuosttaš geardde go serven lei 1970:s. Juo, mii čuoi
gáimet Váljogas deike. Mu mielas lea somát čuoigat báikkis báikái go mohkki nu mo dál, lohká 76-jahkásaš Jan Amundsen ja lasiha:
– In leat goassege vuoitán dáid čuoigamiid. Oktii olahin goalmmát saji.
Nordlys valáštallansearvvi čuoiganjoavkku jođiheaddji Ellen
Inga Haetta Norvang muitala ahte Nordlys lea ráhkadahttán muitoskeaŋkka geat 50 jagi lea oassálastán Kárášjoga čuoigamiin.
– Lea tallearkka mii čájeha galle jagi lea searvan Kárášjoga čuoigamiin. astrid.helander@avvir.no