– Dronnet lei vissa ordnen dan láhkai ahte galgá beassat čohkkát mu bálddas
Cuoŋománu 9. beaivvi ledje 24 olbmo, geat leat Gonagasa ánsomedállja ožžon, Gonagaslaš šloahtas guossin, okta sis lei sápmelaš Aage Agnar Solbakk.
Lea árbevierru ahte medálljavuostáiváldiide sávvet bures boahtima Šlohttii.
Aage Agnar Solbakk, gii čakčamánu 26. beaivvi 2023 oaččui ánsomedálja, lei okta sis gii galledii Šloahta maŋŋebárgga. Sus lei iežas nieida Majja Smuk Solbakk mielde mieđušteaddjin.
Medálljavuostáiváldi ja mieđušteaddjit besse galledit muhtin Šloahta čábbámus lanjain, ovdal go Majestehta Dronnet, ja Gonagaslaš Allavuođaguovttos Ruvdnaprinsaregeanta ja Ruvdnaprinseassa sávve sidjiide buresboahtima. Go buohkaide ledje sávvan bures boahtima, de čohkkededje dronnet, ruvdnaprinsabárra ja guossit beavdegurrii Stuora feastasálas, gos lei guossoheapmi, sártnit, ja musihkalaš guoimmuheapmi.
– Dat mii munnje lei hearvái ja somá lei ahte mun bessen čohkkát dronnega bálddas. Dahje dronnet lei vissa ordnen dan láhkai ahte galgá beassat čohkkát mu bálddas. Várra go dieđus diđii ahte mun han lean luossabivdi, ja dan han lea maiddái gonagas, muitala Solbakk.
Galledan Finnmárkku
Solbakk muitala ahte dronnet lei ovddit geasi luomus Finnmárkkus, ja dan oktavuođas finai Deanu museas Buolbmágis. gos museahoavda ofelasttii ja čilgii Deanučázádaga luossabivdoárbevieruid birra.
– Dat mii munnje lei somá lea go musea lei bardán mu girjjiid gávpái muhtun hildui, ledje várra 30 mu girjjiin. De lei dronnet beassan válljet muhtun mu girjjiin ja váldán fárrui Šlohttii. Nu ahte maiddái leat mus moadde girjji Šloahta bibliotehkas. Dat lei munnje hearvái, muitala son.
Solbakk muitala ahte soai dronnegiin hálešteigga veaháš dan birra.
– Son muitalii dan vásáhusa birra go lei fitnan Deanu museas ja galledan, ja lei hirbmat duhtavaš dainna čilgemiin maid museahoavda dagai luossabivddu kultuvrra birra, ja dat lea go gonagas han nu liiko luossabivdui, dadjá son.
100 proseantta virgi
Šloahtas lei logaldallan gussiid birra geat leat ožžon ánsomedálja galledeami oktavuođas. Solbakk čilge ahte eai lohkan namaid, muhto ieža dihte gean birra lei mii.
– Lei hui hearvái go namuhii mu duogáža ahte lean luossabivdi ja luosabivddu historjáberošteaddji. Son, gii logai, sáhtii vel lasihit ahte son devddii diibmá 80 jagi, ja dalle son lea penšonerejuvvon. Ovdal lei sus 150 proseantta virgi, ja dál lea 100 proseantta virgi sus. Dalle gal reaškkihedje buohkat, ja dat lei somá, muitala Solbakk.
Gonagasa ánsomedálja vuođđudii Gonagas Haakon VII guovvamánu 1. b. 1908. Dat juhkkojuvvo dan ovddas go lea bargan erenoamáš servodatávkkálaš barggu surggiin nu go dáidagis, kultuvrras, diehtagis, ealáhusain ja sosiála ja humanitára surggiin.