Erna vil ha Tour de France til Bergen
– Absolutt ein god ide, sa Erna Solberg om Tour de France-etappar i heimbyen. I dag sjekka statsministeren beredskapen i VM-byen.
Utanfor er det sol og VMstemning. Berre mellom Store Lungegårdsvannet og Nordnes er 76.000 menneske ute i gatene, og talet stig.
Samtidig gjer Erna Solberg entre på rådhuset i Bergen. Laurdag ettermiddag skal statsministeren under panseret til VM-byen. Ho er på veg inn i det som byrådsleiar Harald Schjelderup kallar motorrommet.
– Der inne skjer det mykje. Dette er ei verdsnyheit, seier han og viser statsministeren inn i det som vanlegvis er eit ordinaert komiterom.
Alle på eitt golv
Samvirkesenteret er namnet på nyskapinga. Her inne sit alle som samarbeider om ein trygg VM-by, side om side. Brannvesen, politi og Røde Kors. Sivilforsvaret, Skyss og mobilselskap. Alt i alt 31 ulike aktørar samla i eitt rom.
Det er berre å ta kontakt over pc-en når situasjonar oppstår og må løysast her og no. Slik blir ressursbruken og samarbeidet langt meir effektivt i det store og komplekse VM-arrangementet.
– Små hendingar som vi før brukte fire dagar på å løyse, bruker vi fire minutt på her, fortel kommunaldirektør Robert Rastad.
– At den offentlege beredskapen lyfter i fellesskap på denne måten, er ein heilt ny arbeidsmetode, som vi vil få nytte av ved andre store arrangement og i krisesituasjonar. Også for andre storbyar i inn- og utland bør dette vere interessant, seier Schjelderup.
Ser etter slekta
Statsministeren bråstoppar framfor ein av dei mange tv-skjermane. VM-syklistane syklar i full fart langs Årstadveien.
– Snart kjem dei forbi barndomsheimen min! Eg kunne ha sett på frå jenterommet. Eg må sjekke om slekta står og heier, seier Solberg.
Få sekund etter går ho vidare. Tv-kamera registrerte ikkje eit einaste familiemedlem.
– Hekken var ikkje klipt, konstaterer Solberg.
Fløyen-rittet frå New York
For første gong er statsministeren tett på VM-festen. Rittet opp Fløyen onsdag måtte ho sjå på tv i New York, der ho denne veka var på generalforsamling i FN.
– Fint å vere på fest i Bergen! Dette er moro, seier Solberg på veg ut i sola og folkehavet.
– Kva betyr sykkel-VM for Bergen som turistmål?
– Det fantastiske med sykkelritt er at arenaen er ute. Vi får sett byen og folkelivet. Turistar vil oppleve det som attraktivt å reise hit. Dette er bra, ikkje berre for Bergen, men Norge, seier Solberg.
– Byrådet vil ha Tour de France-etappar til Bergen. Er det ein god ide?
– Absolutt! Tour de France er eit spektakulaert og spennande ritt, og eit stort og internasjonalt arrangement. Det hadde vore spennande, seier Solberg.