Ny død kval fekk magen granska
Ein ny stranda, død kval ved Ågotnes vart fredag spretta opp. Denne gong var magen fri for plast.
Fredag tok miljøaktivist Rune Gaasø seg fram til Vindeneset, ikkje langt frå Ågotnes, der ein kval ligg i fjøresteinane. Ifølgje lokalkjente skal dyret ha lege der ei god stund, og forråtningsprosessen har kome ganske langt.
Same stad som i vinter
I februar måtte ein sjuk kval avlivast ikkje langt unna. I magesekken hans fann forskarane 30 plastposar, store plastflak og mange små plastbitar.
Gaasø trudde først det denne gong var ein beluga-kval, men etter naerare gransking kom ekspertane til at det truleg er snakk om ein grindkval.
Forskar Marte Haave frå Uni Research var også på plass ved kvalen. I 14-tida tok dei hol på dyret, for å sleppe ut gassar i kadaveret. Dei venta på marinbiologar frå Universitetet i Bergen, som skal undersøkje dyret naerare.
– Eg fekk telefon frå kommunen kl. 10.30 i dag, seier Kenneth Bruvik, ein annan av miljøaktivistane. Spørsmålet frå kommunen var om Bruvik ville sjekke det døde dyret, eller om dei skulle taue kadaveret til havs og senke det.
Bruvik seier til BT at kvalen var innsurra i plasttau då han vart funnen.
Luktar sterkt
BTs reporter Anne Jo Lexander melder om sterk stank ved kadaveret, som er ca. fire meter langt.
– Det stinkar som av rote kamskjel, seier Lexander.
Marinbiologane Christoph Noever og Nina Mikkelsen kom fredag ettermiddag til staden for å dissekere dyret. Idet magesekken åpnes må fleire snu seg bort for ikkje å brekke seg.
Undersøkingane viste at det ikkje var plast å finne, korkje i tarmen eller magen på kvalen.
– Men magesekken er ikkje heil, så det er ikkje godt å seie noko sikkert, seier Marte Haave.
DNA-prøver er tatt
Marinbiologane tok med seg DNA-prøver, for å undersøkje kva slags populasjon kvalen tilhøyrde.
Aktivist Kenneth Bruvik meiner det er viktig å sjekke magane på døde kval, etter funnet av plastkvalen i februar.
– Tidlegare vart dei jo berre søkkte, utan at nokon brydde seg, seier Bruvik.
Også denne vart fredag ettermiddag dratt ut på sjøen, i håp om at han skulle søkkje.