Annankvar dag gjer sjukdomen så vondt at Røthe ikkje orkar å gå fort på ski
– Det er kjedeleg å få beskjed om at eg har noko slikt, men det er veldig greit å ha noko handfast å forholda seg til. No slepp eg å ha vondt her og der og ikkje vita kva det er. Diagnosen gir meg noko å jobba ut i frå, seier Røthe.
Nokon dagar er skiløparen heilt fin. Andre dagar er han veldig dårleg. Når han er dårleg, er det så gale at han vert hemma av det i kvardagen. Kroppen vert stiv og støl.
–Då kan eg liggja på ryggen på senga. Men eg kunne aldri ha lege på ei treningsmatte, for eksempel. Det hadde vore for vondt.
Sjukdomen har gjort at Røthe har vore nødt til å stå over trening. No har han tilpassa seg slik at han har fleire og kortare økter, noko som er lettare å gjennomføra. Samstundes er trening den beste medisin mot bekhterevs.
Landslagstrenar Tor-Arne Hetland skryt over at Røthe aldri klagar over smerter på trening, sjølv om han ser at eleven er både stiv og støl til tider.
– Han skuldar ikkje på sjukdomen. Sjur er ein fantastisk lagspelar, og har vist at han er ein stor idrettsutøvar, seier Hetland.
OL-billetten er i spel
Røthe sleit med ryggen under VM i Falun i 2015. Då fullførte han ikkje 30-kilometeren, og fekk niandeplass på 15-kilometeren. VM i Lahti i fjor var betre med ein fjerde- og ein sjetteplass. Men det viktigaste er OL. Og slik det er no, er ikkje Røthe kvalifisert til å delta i Pyeongchang om mindre enn to månader.
Derfor må han visa seg fram. Den jobben byrjar i helga når han skal gå renn i italienske Toblach. Ein god prestasjon der vil gjera at han kan kvalifisera seg til Tour de Ski, som igjen vert viktig for å få vera med til OL.
– Det hjelper ikkje å seia at kroppen ikkje har fungert i skirenna eg må kvalifisera meg i. Eg må gå fortare enn eg har gjort til no, og eg må vera så bra at eg kvalifiserer meg med kanonresultat, seier Røthe.
Draumen hans er framleis å stå på pallen etter femmila i OL.
– Men eg må verta betre om eg skal ha noko i OL å gjera, innser Røthe.
Landslagstrenar Hetland avdramatiserer Røthes svake sesongstart, og meiner det framleis er tidleg i sesongen.
– Alle veit kva som krevst for å vera på OL-laget. Då må han vera heilt i toppen. Det vil Sjur vera, det er eg ikkje redd for, seier Hetland.
– Trur du han kjem til OL?
– Eg håpar verkeleg det. Men det er steinhardt å koma på laget. Me må ta kvalikløpa først, så får me sjå. Løparane veit kva som krevst, seier landslagstrenaren.
– Ein dårleg dag
Då langrennssesongen starta slik han alltid gjer på Beitostølen i november var Røthe klar. Eit godt resultat der er viktig for å verta teken ut til å gå i verdscupen. Men då fredagen kom hadde han ikkje sjans til å stilla til start.
– Den fredagen på Beitostølen var ein dårleg dag. Eg gjorde alt for å gjera meg klar, men det var ikkje vits i, eg hadde så vondt.
To dagar etterpå gjekk han inn til sjetteplass på 15 kilometer fristil same staden. Slik kan dagsforma hans variera mellom dårleg og god. Men det var ikkje nok til å verta teken ut til verdscupstarten i Ruka i Finland. Helga etter fekk han gå på Lillehammer, men endte opp med å ikkje fullføra 30-kilometeren med skibytte.