Mange er positive til brukte julegåver
Halvparten av dei spurde i ei undersøking seier dei ville reagert positivt på å få ei brukt julegåve, men berre 2,4 prosent har planar om å gi ei slik gåve.
InFact har på oppdrag frå Fremtiden i våre hender spurt nordmenn om kva dei ønskjer seg til jul.
Resultata er opplyftande, meiner leiaren i miljøorganisasjonen, Anja Bakken Riise.
Brukt og bra
– At fleire ønskjer seg miljøvennlege gåver enn det som blir gitt bort i dag, viser at det i dag er eit stort potensial i Noreg for ei meir miljøvennleg jul, seier ho til NTB.
– Produksjonen av tinga vi gir kvarandre til jul, krev ressursar og fører til store klimagassutslepp, seier ho.
Undersøkinga viser blant anna at over halvparten av dei spurde ville reagert positivt på å få ei brukt julegåve, mens knappe éin av fem ville reagert negativt.
– Å kjøpe brukt og dermed bidra til at ting lever lenger, i staden for å kjøpe nytt, er derfor eit veldig godt miljøtiltak, seier Bakken Riise.
– Eit søk på Lego på Finn. no gir over 4000 treff. Eit søk på smykke gir naer 15.000 treff. Det tyder på at utvalet av brukte gåver er ganske stort, meiner ho.
Samtidig svarar tre av fem at dei aldri har gitt bort brukte julegåver. 26 prosent har gjort det, og berre 2,4 prosent planlegg å gi bort ei brukt julegåve i år.
Også opplevingsgåver, som musikk, teater, musikal eller restaurantbesøk, har fått auka merksemd dei siste åra.
Opplevingar
Undersøkinga viser at delen av befolkninga som føretrekkjer å få opplevingsgåver, er over dobbelt så stor som delen som føretrekkjer å få ting til jul. Mens 46 prosent ønskjer seg opplevingar, svarar 19 prosent at dei ønskjer seg ting.