Skal fornya Folgefonna som skidestinasjon
Investorane Trond Mohn og Øystein Stray Spetalen er mellom dei som satsar 28 millionar kroner på det nye velkomstbygget på isbreen.
– Eg har stått på ski mange stader i verda. Fonna er heilt unikt, seier Spetalen til BT.
Investoren frå Sandefjord har sterke røter i bygda som husar sommarskisenteret Fonna. Mor hans er frå Jondal og Spetalen har lagt att mykje tid på breen.
– I tillegg har eg barn som har drive med alpint. Det var motivasjonen for å vera med på å utvikla destinasjonen, seier Spetalen.
Rosar produktet
No er han ein del av ei investorgruppe som vil ta Fonna til eit nytt nivå. Grunnsteinen i satsinga er eit nytt velkomstsenter til 28 millionar kroner.
Ny restaurant, salslokale og informasjonssenter er mellom planane i den kraftige oppgraderinga.
– Eg er ingen lokalpolitikar, men når ein har eit så godt produkt som Fonna, må ein utvikla det, seier Spetalen.
Saman med medinvestor Gunnar Hvammen, industrimilliardær Trond Mohn og to lokale investorar, har Spetalen satsa kapital i Fonna i fleire år.
Sidan dei overtok Visitfonna AS i 2013 er skitrekket vorte lengre og løypenettet betre.
– Dei tilsette har gjort ein fantastisk jobb med å gjera produktet best mogeleg. Me byggjer stein på stein, seier Spetalen.
Mohn: – Glad i Hardanger
I over 20 år har det vore mogeleg å driva med sommarski på Noregs tredje største isbre. Det høgaste punktet ligg 1450 meter over havet.
Hordaland folkeblad var dei som først skreiv om planane til Folgefonna Velkomstsenter AS, som Visitfonna og Folgefonni breførarlag står bak.
Av eigenkapitalen på vel ni millionar kroner, er det Trond Mohn som bidreg mest. Han har ein eigardel i Visitfonna på 42,86 prosent.
På klingande dialekt er det tydeleg at Mohn har eit hjarte for å investera òg i denne delen av Vestlandet:
«Er glad i Hardanger og me lyt støtta dei på hi sido av fjorden også», skriv han om bakgrunnen for investeringa i ein SMS.
Har mangla komfort
Etter å ha meir enn dobla omsetnaden frå 3,4 millionar kroner i 2013 til vel 7,4 millionar kroner i 2017, er tida komen for å ta Fonna til eit nytt nivå.
– Dagens tilhøve legg ikkje til rette for vekst og utvikling av sommarskisenteret slik me ønskjer. «The missing link» har vore komfort og kvalitet på det som er rundt sjølve opplevinga, seier dagleg leiar Andreas Skogseth i Visitfonna.
Målet er å utvikla Fonna til det leiande sommarskisenteret innan alpint, langrenn og park. Tilbod om guida breturar er òg ein del av drifta.
– Eit nytt velkomstsenter vil ta oss frå å vera eit produkt for dei spesielt interesserte, til eit produkt for allmenta, seier Skogseth.
Innovasjon Norge har trua
Oppgraderinga ved breen skal etter planen kosta 28 millionar kroner.
Utanom kapital frå Mohn og co, er Innovasjon Norge inne i prosjektet med eit tilskot på fem millionar kroner og åtte millionar kroner i lån.
Nina Broch Mathisen, direktør for Innovasjon Norge i Hordaland, fortel at finanseringa er gjeve etter vurdering av risikoen til prosjektet, potensial og gjennomføringsevne.
– Folgefonna Velkomstsenter og den auka tilstrøyminga av turistar til Fonna kan ha positive ringverknadar for både lokalt og regionalt næringsliv, og sysselsetting. Det er ei spennande reiselivsutvikling i heile regionen, både det som skjer i Folgefonna og ved Trolltunga, seier ho.
Sparebanken vest bidreg på si side med tre millionar kroner i lån.
Vil verta heilårsdestinasjon
Med det nye senteret ser initiativtakarane føre seg heilårsdrift. Normalt varer sesongen på Fonna frå mars-april til september-oktober.
Bilvegen frå Krossdalen og opp til skisenteret er både gammal og spektakulær, og ikkje særleg eigna vinterstid.
– Då kan det vera aktuelt å bruka tråkkemaskin, og å tilby aktivitetar som både catskiing og breturar med breførarlaget. Events og skreddarsydde opplegg for turistar er òg noko me ønskjer å utvikla, seier Skogseth.
Han rosar Jondal kommune i prosjektutviklinga.
– Dei har vore ein god og viktig støttespelar, seier Skogseth.
Spetalen er oppteken av å veksa organisk, men òg å satsa når det trengst.
– Me har gått små steg, men no gjer me eit kvantesteg, seier han.