– Det er det største eg har vore med på
Fredag fekk Vinjar Slåtten sin OL-debut. Sjølv etter eit fall i kvalifiseringa har han ikkje mista motet.
– Det gjekk ikkje så bra i dag. Det gjorde ikkje det, seier Vinjar Slåtten.
27-åringen frå Voss var ein av dei første ut under dei olympiske leikane i Pyeongchang.
Grytidleg om morgonen fredag norsk tid var han med på å tjuvstarta OL før opningsseremonien var i gang. Nokre timar etter møtte han BT i OL-byen, like utanfor Olympiastadion i Pyeongchang.
– Å delta i OL er det største eg har vore med på som idrettsutøvar, utan tvil, sa Slåtten, ein time før han skulle gå inn under opningsseremonien saman med resten av den norske troppen.
Datt etter hoppet
Men det er jo idretten han er her for, og under kvalifiseringa fredag gjekk det ikkje som planlagd for Slåtten då han skulle ned kulekøyringsbakken.
Vossingen hadde lenge eit fint driv, og han kom seg bra over det første hoppet. Men på det andre hoppet – like før mål – gjekk det galt. Slåtten mista balansen, og då han landa datt han.
– Alt gjekk bra fram til fem kuler før det siste hoppet. Eg mista balansen, kom bakpå og bomma. Det var kjedeleg, seier Slåtten.
Dei som følgde konkurransen på fjernsyn kunne sjå at Slåtten ytra eit ukvemsord eller to då han kom i mål.
– Det var så dumt å øydeleggja heile løpet. For resten var eigentleg bra, seier Slåtten.
Han har slite med å få ut sitt beste i konkurransar i år.
– Fram til fallet gjekk alt veldig bra. Eg trur dette hadde vorte ein god prestasjon utan fallet, seier Slåtten.
Ny sjanse
Heldigvis for Slåtten får han ein ny sjanse måndag. Før finalane i kulekøyring startar, er det ei ny kvalifisering for dei som ikkje kvalifiserte seg fredag.
– Eg må berre gjera det same som i dag, sett vekk frå fallet. Eg må køyra på det nivået eg veit eg har inne, og så løysa det når eg kjem på hoppet.