Furet vaerbitt over og ut
Sjuande far i BT ODDNY MILJETEIG har rett: Ja vi elsker må skrotast. Det er for dumt å syngja alt hva fedrene har kjempet, mødrene har grett på den internasjonale kvinnedagen. På 17. mai også. Gråtekoret er kvinnefornedrande. For å berga fedrelandssangen frå historiens skraphaug, kunne det kanskje nedsetjast ein raskt arbeidande komité, som kan luka ut sexismen? Og taua vekk nasjonalismen og sjåvinismen og herrefolksmentaliteten og religionsrasismen i same slengen?
JA VI ELSKER var sikkert grei å ha så lenge folk ikkje visste betre. Den gongen nasjonalismen svulma usensurert i brystet, då ingen hadde høyrt om #metoo og landet var blendakvitt. No bør vi vita betre. Fedrelandssong, liksom? Kva med barn som har mor og medmor, og ikkje treng nokon far? Kva med slike som Salhusvinskvetten syng om, hen som korkje hadde far eller mor, tanta hadde fått hen med ein sjømann? Og kva med onklar og hanreiar og menn med spermiediskrepans? Betaler ikkje dei skatt og bompengar og sukkeravgift, kanskje? Og transene, som ikkje ein gong får lov til å gå på det doet som hugar dei best?
Oddny Miljeteig meiner sikkert det kan kreerast ein ny, ikkje-krenkande komitésong for alle som har opphaldsøyve i kongeriket, ein sang som er livssynsnøytral og kjønnsnøytral og etnisk nøytral og som inkluderer alle lhbtqia-personar og alle andre identitetar. Nett som julesangane til Human-Etisk Forbund. Så feil kan ein ta. Ho bør avlysa alle forsøk på sosiale syngekonvensjonar. Kvite, gammalnorske gamlingar er så fullstappa av sentimentalitet og nostalgi at humanistiske verseføter ikkje løftar seg frå holka.
DET ER KANSKJE ein del av menneskenaturen å klumpa seg saman i folkestammar og klanar og syklubbar og mannalag og syngja og skrika, slik at dei blir primitive i hovudet og kollektivt uansvarlege og eventuelt fanatiske. Men slike fakter er ikkje noko politisk ansvarlege folk bør fyra opp under. Fedrelandssongar er innesnødde. Dei som ikkje greier seg utan korøvingar, kan gå på fotballkamp. Dei som absolutt vil bli blanke i auga, kan skjera lauk.