DNS er på mannejakt
Teateret har lagt ut på jakt etter mannfolk. Målet er å få dei til å gå på teater av eiga fri vilje.
– Det er ikkje ofte vi ser kompisgjengar her på teateret, nei, seier teatersjef Agnete Haaland ved Den Nationale Scene.
– Det er langt fleire venninnegjengar og «kulturkjerringar», slike som meg, held ho fram spøkjefullt.
Det vil Haaland ha ei forandring på.
Derfor har DNS saman med Bymuseet no sett i gong ei jakt på menn som ikkje brukar teateret og museet frivillig, for å spørje dei kva som er årsaka.
– Det er kjempebra at kvinnene er opptatt av DNS, men vi forvaltar skattepengar, og har ei plikt til å nå eit breiast mogeleg publikum. Ikkje berre dei med teater som kjerneinteresse. Derfor leitar vi no etter menn til å bli med i denne fokusgruppa, seier Haaland.
Utgangspunktet for mannejakta er ei undersøking Norsk publikumsutvikling (NPU) laga i fjor. Den viser kven som nyttar seg av kulturinstitusjonane i Hordaland. Både Den Nationale Scene og Bymuseet i Bergen beit seg merke i tala som viste at mennene er i mindretal.
– Skeivfordelinga
ligg
først og fremst i den fasen når det blir bestemt at ein skal gå på teater og billettane blir kjøpte. I salen er det som regel ei kjønnsfordeling på rundt 50/50, men som oftast er det damene som kjøper billettane. Dette er gjerne vaksne kvinner tilsett i offentleg sektor. Mennene er meir som vedheng, seier direktør i NPU, Ingrid Handeland.
Nøyaktige tal på kva kjønn som kjøper billettane på DNS finst ikkje, men ut ifrå liknande undersøkingar anslår Handeland at heile 80 prosent blir kjøpt av kvinner.
– Det er mitt stalltips. Kvinna er kulturministeren i heimen.
Ho trur ikkje klisjear som fotball og øl vil fungere for å snu trenden.