Røthe fekk fornya tillit
Sjur Røthes knallsterke sesongavslutting i NM betydde truleg meir for sjølvkjensla enn uttaket.
Måndag blei langrennslandslaga for sesongen 2018– 2019 presentert. Petter Northugs retur blei det store samtaleemnet, men det var ein ørliten spenning knytt til landslagsframtida til Sjur Røthe (29).
– Det er alltid litt spennande, for ein veit aldri, seier Røthe til BT etter pressekonferansen.
Fekk gode indikasjonar
Vossingen sleit med å finna ut av eit ryggproblem tidleg i sesongen, og før jul fekk han diagnosen Bekhterevs sjukdom. Han måtte bryta Tour de Ski, og til slutt brast også OL-draumen.
NM del to blei derimot ein gedigen opptur. Fyrst blei det gull på ti kilometer klassisk, før han toppa helga med gull på femmila etter ein dramatisk innspurt.
– Eg var spesielt nøgd med tikilometeren, og det var stort å bli norsk meister, seier Røthe.
– Måtte du visa deg verdig ein plass på laget under NM?
– På ein måte, ja, samstundes så fekk eg gode indikasjonar på slutten av sesongen at den kunne setjast litt på sjukdomskontoen, så det betydde vel meir for mi eiga kjensle enn uttaket, seier Røthe.
Landslagssjef Vidar Løfshus sa følgjande om Røthe på pressekonferansen:
– Vi veit kva som bur i han. Han har hatt ein litt tøff sesong, fått ein diagnose, men har jobba veldig bra saman med helseteamet og funne ut av plagene. På slutten av sesongen viste han kvifor han fortener å vera med på laget.
– Opp og ned
Røthe gir kombinasjonen medisinering og tett oppfølging frå støtteapparatet, saman med rett trening, mykje av aera for at han har løyst sjukdomsutfordringa.
– Det går framleis litt opp og ned. Om eg trenar lite, eller ingenting, så kjem det litt tilbake. Eg fomla litt i blinde midtvegs i sesongen, men har byrja å naerma meg normalen att, seier Røthe.
NM-gulla gav vossingen svar på at han gjorde mykje rett i sesongen som var. Det store målet neste sesong er VM-femmila i Seefeld.
– Den blir fokus nummer ein, to og tre, og mykje av treningsarbeidet vil bli lagt mot den, men då må ein også vera god i forkant. Mykje skal skje før den tid, seier Røthe.
Sjå oversikt over neste års landslag i resultatbørsen.