BKK drap mykje fisk i lakseelv
Daud fisk flaut i lakseelva Ekso laurdag, etter at BKK pumpa elvevatnet fullt av luft.
– Elva var heilt kvit. Og det susa som frå ei brusflaske som blir opna.
Slik skildrar fagkonsulent Eirik Straume Normann i Uni Research Miljø LFI det som møtte han ved Myster kraftverk i elva Ekso i Vaksdal laurdag formiddag.
Normann arbeider med villaks til dagleg, og var på veg heim frå eit oppdrag i Modalen då han la merke til at fargen på elva ikkje var normal.
– Først trudde eg at det hadde gått eit leirras som farga vatnet kvitt. Eg køyrde ned til kraftstasjonen. Då eg opna bildøra, høyrde eg suset frå luftboblene i vatnet, seier fagkonsulenten.
Luftbobler i skinnet
Ei rist hadde gått tett ved vassinntaket til kraftverket, eit par mil lenger opp. Dermed saug kraftverket inn store mengder luft, som så vart piska inn i vatnet under høgt trykk i turbinen, før det vart sleppt ut att nedanfor kraftstasjonen.
For fisken er vatn med for mykje luft livsfarleg.
–Heile elva var kvit av luftbobler, heilt ned til sjøen, seier Normann.
I løpet av kort tid tok han opp sju daude fiskar, i storleiken 5–15 cm. På finnane var det synlege luftbobler i skinnet.
– Det er eit klart teikn på luftovermetting, seier fagkonsulenten. Ved hjelp av eit elektrisk fiskeapparat som slår fisken i svime henta han og ein kollega også opp tre fisk som var i live.
– Normalt skulle vi funne fleire fisk på den staden. Også på fisk som var levande såg vi luftbobler på finnane, seier Normann.
Han kunne også sjå måse som stupte ned og plukka svimeslått eller daud fisk som kom rekande.
– Eg har sett gassovermetting i vassdrag også tidlegare, men aldri i slik omfang. Dette er ei alvorleg sak, seier Normann.
Var stengt for fiske i 25 år
Ekso var lenge ei av Vestlandets mest kjente og beste lakseelver. Rekorden er på 28 kg, fiskarane kom heilt frå England og Skottland.
Men kraftutbygginga på 70- og 80-talet gjorde forholda for laksen stadig dårlegare, og i 1991 vart elva stengd for fiske av villaks. Det skulle gå 25 år før grunneigarar, Uni Research Miljø og BKK i fellesskap hadde greidd å få opp att bestanden såpass at fiskinga kunne gjenopptakast.
Nå fortviler grunneigarane, som berre sidan 2016 har seld fiskekort for laks.
– Eg er redd BKK her har tatt livet av det meste av fisken som var i elva. Laksestammen her var jo heilt på knea, og vi har arbeidd og kultivert han i mange år, seier leiar Heine Eikefet i Ekso Elveeigarlag.
Den fisken som stod ovanfor kraftstasjonen er ikkje råka, men Eikefet fryktar for all smolten som fanst i den nedre delen av elva, som er ein liten kilometer lang.
Også miljøvernavdelinga hos Fylkesmannen i Hordaland vart varsla laurdag.
Trur elva må stengjast
Dykkarar var ute i elva laurdag kveld, for å sjå etter daud fisk.
– Dei fann 15, på eit lite område. For elva er dette ein katastrofe. Både yngel og smolt er råka, seier mangeårig leiar av elveeigarlaget Knut Eirik Møster. Han var laurdag kveld ute for å sjå på arbeidet som gjekk føre seg langs elva. Han trur elva nå blir stengd for fiske att.
– Det er eit sannsynleg tiltak, dessverre. Laksen må koma først, seier Møster.
Fekk alarm fredag og laurdag
Kommunikasjonsrådgjevar Jarle Hodne i BKK Produksjon stadfestar at noko gjekk gale ved kraftverket laurdag.
– Vi tek dette med største alvor, og er svaert lei oss for det som har hendt. Sjølv om vi reagerte kjapt, har hendinga dessverre fått miljøkonsekvensar, seier Hodne.
BKK fekk allereie fredag formiddag ein alarm på sitt anlegg, som indikerte at ei rist ved vassinntaket var gått tett.
– Vi regulerte ned produksjonen umiddelbart, og sende ein mann oppover for å reinske rista. Då det var gjort, køyrde vi produksjonen opp att. I dag fekk vi ein ny indikasjon på at rista var tett, og vi sende på nytt ein mann opp for å reinske, seier Hodne laurdag kveld.
Denne siste alarmen gjekk ca. kl. 11.50, ifølgje Hodne. Kort tid etter kom meldinga om kvit elv og daud fisk.
Har plassert ut måleutstyr
Forskar Ulrich Pulg ved Uni Research Miljø LFI sat laurdag kveld og analyserte dataene han hadde fått inn så langt.
– Når elva blir kvit, eller blakka, som vi kallar det, tyder det på svaert høg gassovermetting i vatnet. Fisken får gassblaeresjuke, som gir tilstopping i blodårene. Tilstanden svarar til dykkarsjuke hos menneske, seier forskaren.
Dei har nå sett ut måleutstyr i elva for å overvake gasskonsentrasjonane, og gitt råd for å unngå nye slike hendingar.
– Vi vil vite meir om skadane etter kvart. Det er observert levande fisk, så bestanden er ikkje heilt utrydda. Nå må vi finne ut kva som har hendt, og bidra til at det ikkje hender igjen, seier Pulg.