Vil gjera dette til eit vanleg syn att
Tre mann ved årene i ein Oselvar. Truleg har ikkje Nordåsvatnet sett slikt på tiår. Kjell Magnus Økland og Atle Bergseth håpar prosjektet om fellesnaust for folk flest skal gi nytt liv til tradisjonsbåtane.
e– Noko som har vore så vanleg, og så rotfesta i vår kultur, det må det vera eit stort potensial for å vekkja til live att, seier Kjell Magnus Økland.
Kontrasten mellom båten og brua vi lirkar oss under, er slåande. Økland håpar tradisjonsbåten kan få sin renessanse.
Når nokon i dag skal ro, skjer det som regel på eit treningssenter. Det er djupt ironisk, synest Kjell Magnus Økland.
Han vil ha roarane ut att på fjorden. Då må båtane gjerast tilgjengelege for allmenta.
Kystkulturtilbod
– Tanken er å etablera fellesnaust med båtar i, lett tilgjengelege for folk flest, seier Kjell Magnus Økland.
Han er dagleg leiar i Stiftinga Kystsogevekene og har skrive sjølve praktverket om Oselvaren, båten som i 2009 vart kåra til Noregs nasjonalbåt.
Hans mandat er å få i gang det han kallar for kystkulturtilbod. Det var naerliggjande å prøva å blåsa liv i rotradisjonen.
– Ein gong var Oselvaren minst like viktig i folks kvardag som bilen, mobilen og alle fjernkontrollane våre til saman er det i dag, seier Kjell Magnus Økland.
Han brenn for tradisjonsbåten.
Ein tur i ein av desse båtane er ei intens sanseleg oppleving, men det er også ei sterk eksistensiell oppleving av at ting stundom treng ta den tida som ting tek.
Når motvinden ruskar i årene, er det naturen som bestemmer kor fort det går.
Kartlegging
Ideen om fellesnaust er rundt eit år gammal.
Økland og Bergseth driv no og kartlegg mogelege lokalitetar, lavterskel møteplassar som kan kombinera folkehelse med folkeopplysning, samstundes som sjølve kulturtradisjonen som båtbygginga representerer, blir halden i hevd.
I plan- og bygningsetaten i Bergen kommune er dei positive til planane.
Nordåsvatnet er prioritert for idrett og friluftsliv, og planane om fellesnaust glir godt inn i dei langsiktige vyane for vatnet.
– Vi trur at slik aktivitet kan passa godt inn, saerleg i den indre delen av Nordåsvatnet, som ligg relativt skjerma for vêr og vind. Men det er sjølvsagt ei utfordring å finna ei tomt som det kan byggjast på, eller ledige naust som kan overtakast.