Bra oppgjer for Vestlandet
Jordbruksoppgjeret er bra for vestlandsbonden, og for det borgarlege samarbeidet.
FOR FØRSTE gong sidan Høgre og Frp tok over regjeringskontora har båe bondeorganisasjonane skrive under på jordbruksavtalen. Dels skuldast det at landbruksminister Jon Georg Dale (Frp) har lagt meir pengar på bordet, dels at fem år med landbruksministrar frå Frp har senka forventningane.
Profilen på oppgjeret er opplyftande. Ein av vinnarane er den klassiske vestlandsbonden. Ikkje storbøndene på Jaeren, men dei mindre bruka lenger nord, i Hordaland, Sogn og Fjordane og Møre og Romsdal.
DESSE FYLKA blir no ei eiga arealsone i det sinnrike tildelingssystemet for landbruksstøtte. Dei vil få meir i arealstøtte, i tillegg til at mange bruk får tilskot for større delar av arealet.
Dette er ei viktig endring som gjer det meir lønsamt med ei drift som held kulturlandskapa i hevd, og hindrar attgroing.
Eit hovudpoeng for regjeringa har vore å effektivisere jordbruket, noko som har spegla seg i ei dreiing av støtta til fordel for større bruk. Ingen av desse endringane blir reversert i årets oppgjer.
DET ER EIN SIGER for Frp, som gjer det lettare for dei å svelgje at subsidiane frå staten i årets oppgjer aukar med heile 770 millionar kroner. Til samanlikning møtte dåverande landbruksmininster Sylvi Listhaug (Frp) bøndene med krav om å kutte subsidiane med 250 millionar i 2014.
At regjeringa no er rausare med bøndene, har òg ei viktig politisk side. Venstre og KrF er opptatt av å sikre landbruket, noko dei viste til fulle i 2014. Då pressa dei regjeringa til å gje bøndene 250 millionar kroner ekstra.
FOR VENSTRE er det ein siger at det første oppgjeret etter dei kom i regjering endar så bra. Spesielt i Distrikts-Venstre er dette viktig, fordi ein der finn dei største skeptikarane til regjeringsdeltakinga.
Endå viktigare er dei signala oppgjeret sender til dei same kreftene i KrF. Ei forsonande haldning frå Høgre og Frp i landbrukspolitikken er viktig for å trekkje KrF tettare inn i den borgarlege familien.
SENTERPARTIET lykkast i førre periode å skape eit inntrykk av ei regjering som ville sentralisere Noreg. Det var med på å gjere regjeringsdeltaking vanskelegare for KrF.
Landbruksminister Dale har no gjort det litt mindre vanskeleg. Legg ein til at Sylvi Listhaug er ute av regjeringa og Ap ligg nede, verkar statsminister Erna Solbergs (H) draum om ei firepartiregjering naermare enn på lenge.