Stanghelle seier ja til ny stasjon
Dale med stasjon på Dalegarden, der det er om lag ti fastbuande. Det var knapt så ein kunne tru kva ein las. Heldigvis er det skisserte scenariet meir som science fiction og ikkje ein alternativ banetrasé frå Bane Nor. Etter ufatteleg mange tragiske dødsfall og ulykker langs E16 har ein endeleg lukkast med å få i gang arbeidet med ny veg og bane Bergen-Voss. For oss som bur i Vaksdal, har dette arbeidet vore som ei kjaerkomen gåve. Me som innbyggjarar drøymer om trygg, kort og miljøvenleg reiseveg til Bergen og Voss for oss sjølv og framtidige generasjonar.
STANGHELLE STASJON er ein av dei største pendlarstasjonane mellom Voss og Bergen. Sidan 1883 har Stanghelle vore ei stasjonsbygd, og det vil me halde fram med å vera også i framtida. Stanghellebygda ynskjer vekst, utvikling og mogelegheiter, ikkje isolasjon og stagnasjon. Ei lita aksjonsgruppe med stort medietrykk må ikkje få så tvil om at stanghellingar generelt ynskjer ein jernbanestasjon også i framtida. Ein stasjon er heilt avgjerande for at fjordbygda Stanghelle skal vera ei tilgjengeleg bygd som vidareutviklar seg i takt med tida.
Bedehuset, butikken og kafeen som står i fare for å bli rivne for å rydda plass til ny stasjon, er alle nedslitne bygg med stort behov for restaurering. Det ville vore eit stort løft for Stanghelle om desse bygningane blei erstatta med noko nytt og funksjonelt. Saman med ein moderne stasjon kunne ein med god planlegging fått høve til å etablera eit moderne sentrum som stod i arkitektonisk stil til dei ville fjella og den vakre fjorden som ein har på Stanghelle. Høyringsrunden for ny bane og veg er i gang. Fokuset vidare må vera å finna dei beste løysingane for framtidas stasjon på Stanghelle. Saman med planleggjarane må ein arbeida for å ta vare på innbyggjarar og bedrifter som blir råka av utbygginga, samt miljøet på land og i fjord.
ME TAKKAR Statens vegvesen, Bane Nor og lokale politikarar for deira arbeid så langt.
Stanghelle er ei bynaer og inkluderande fjordbygd! Me ynskjer ein ny og moderne stasjon hjarteleg velkomen og gler oss til framtida!