Studentar som melder flytting - for kven er det vinn-vinn?

Rådsordførar i Hardangerrådet DEI ALLER FLESTE STUDENTAR har så langt ikkje meldt flytting til studiestaden, men vore registrert som innbyggjar på heimplassen sin. Studentar vil som regel gjennom studietida nytta offentlege tenester som lege, tannlege eller andre offentlege tenester i heimkommunen. Slik sett er det naturleg at studentane er registrert med heimeadresse der dei nyttar desse tenestene, og at innbyggjartilskotet går dit.

Forslaget frå Anine Frølich vil innebera ein reduksjon i innbyggjartilskot for distriktskommunar utan høgskular eller universitet, medan store byar som har slike institusjonar «tek over» dette tilskotet. Det er på ingen måte å visa raus haldning overfor små distriktkommunar.

Hardanger er hytteområde for svaert mange med bustad i Bergen kommune. Når bergensarane er på hytta, har dei krav på helsetenester som t.d. lege eller heimesjukepleie utan at dei er registrerte som innbyggjarar. Det er ofte tenester som er langt meir ressurskrevande for den lokale kommunen enn ein student som bur i Bergen utan å ha fast bustadadresse her.

Det verkar også unaturleg å utelukka studentar som er folkeregistrert i kommunar i Hordaland frå ei slik ordning. Berre det er grunn nok til å leggja forslaget bort. At forslaget ikkje handsamar alle likt, er også kommentert på leiarplass i BT 30. mai.