Vi har ein suksess, Elvestuen!
Vi har redusert klimagassutsleppa frå ferjesektoren dramatisk. No ventar eg at statsråden gjer sitt.
Nestleiar utval for miljø og samferdsle (SV)
GJENNOM DEI NYE ANBODA for ferjesambanda har Hordaland Fylkeskommune redusert klimagassutsleppa med 90 prosent. Med Hordaland fylkeskommune sin overgang til el- og hybridferjer har ein bana veg for ein teknologirevolusjon innan ferjedrifta, noko Hordaland har blitt heidra med prisar for. Vi som tek klimautfordringane på alvor, er veldig glad for at el-ferjene viser handling til ei utfordring som i for stor grad er prega av prat.
Men el-ferjene reduserer ikkje berre klimagassutsleppa. Dei styrkjer ei maritim naering, som ser at det er konkurransefortrinn å leggje om til null- og lågutsleppsteknologi. I tillegg skapar dei arbeidsplassar her på Vestlandet, Havyard sitt verft i Leirvik i Sogn skal mellom anna byggje fleire av desse ferjene
HORDALAND FYLKESKOMMUNE var først ut og bana veg, og vi ser at Møre og Romsdal følgjer etter på dei første rutepakkene. Men det er ei stor utfordring: Kraftig prisvekst i anbodskostnadane, stor grad av nybygging på ein eldgammal ferjeflåte og ny teknologi.
Sjølv om ein frå staten har fått tilskot til ladeanlegg frå Enova og støtte frå NOX-fondet, så sit Hordaland fylkeskommune igjen med ei årleg rekning på 240 millionar i auka driftskostnader. Dette er ikkje berekraftig, reint økonomisk.
Ein skulle tru at ei regjering beståande av Høgre, Frp og V ville sørgje for å stimulere til fleire arbeidsplassar og eit konkurransedyktig naeringsliv, men det er ingen signal om auka midlar. Tvert imot, same regjering reduserer overføringane til fylkeskommunane.
Eg fekk måndag 11. juni mogelegheita til å vere med i ein internasjonal klimadialog, såkalla Talanoa-dialogue saman med klima- og miljøminister Ola Elvestuen, nettopp for å presentere resultata frå ferjeanboda. Der sa statsråden: «Den enklaste måten å få med seg staten på, er å gjere ein suksess».
EG VEL Å TA STATSRÅDEN på ordet. Vi har redusert klimagassutsleppa frå ferjesektoren dramatisk, vi har styrkja naeringslivet og skapt arbeidsplassar, kva er meir ein suksess enn nettopp dette?
Eg forventar at Elvestuen held sitt. Eg forventar at staten kjem fylkeskommunane i møte og bidrar slik at denne omstillinga kan fortsette. Det er mange fylkeskommunar som framleis ikkje har starta med sine anbod. Kva staten gjer framover, er avgjerande for om Hordaland og Møre og Romsdal vert aleine, eller om dette kan fortsette for heile sektoren.
REGJERINGSPARTIA H, V OG FRP har sidan 2013 gitt 21,5 milliardar meir i skattelette til dei aller rikaste i landet. Det er ikkje mangel på pengar, det manglar ei regjering som prioriterer det grøne skiftet.