Kunsten i augneblinken
Professor, Dr. polit. Sosiologisk institutt, UiB
Leitinga etter sikker kunnskap fører til avfortrylling av det viktige i livet, slik som fotball og kjaerleik, og å gjera dei moralsk rette handlingane. Det er heller ikkje opplagt at videodømming fører til mindre skjønn i dommaravgjerslene. Her er det mange døme, men eg avgrensar med til tre.
FOR DET FØRSTE må dommaren bestemma at situasjonen appellerer til bruk av videodømming. Skjønnet vert difor minst like avgjerande som før, det er berre tale om forskyving av skjønnet. Og det oppstår også ein ny limbofase, eller eit nytt grenseland: I ein av dagens kampar gjekk det om lag 10 sekund mellom den diskutable situasjonen, og til dommaren signaliserte at han ønskte å sjå episoden på video, altså stogga tida ved eit tilbakevendande oversyn.
I desse 10 sekundane er det fullt mogeleg at eit av laga kunne ha laga mål. Kva skulle dommaren gjera då. Godkjenna målet, eller ikkje?
FOR DET ANDRE vil det alltid finnast grensetilfelle, var spelaren på ballen eller foten, var ballen innanfor målstreken, eller utanfor, sto spelaren i offside eller ikkje. Kva om det er nødvendig med ein annan synsvinkel, eller kameravinkel. Det er opplagt at full visse krev at episoden vert vurdert frå eit mangfald av kameravinklar, kor mange er nok.
FOR DET TREDJE, er dommaren si avgjersle, eller skjønn, i mange tilfelle avhengig av adekvat fortolking av spelaren sin intensjonalitet, eller hensikt. Søkte ballen handa, eller prøvde spelaren å stogga ballen med hensikt eller vilje. Korleis skal slike intensjonelle episodar vurderast gjennom videoovervaking. Kan slik intensjonalitet målast gjennom dette videoblikket.
For meg kan nokre fotballstunder vera fortryllande augneblink. Og av og til kan eg fyllast av tvilen om ho verkeleg elskar meg, og vi leitar etter teikn på frelse og kjaerleik, sjølv om vi inst inne veit at kjaerleiken lever av tvilen og det å tru og ikkje vira dette sikkert, og at kjaerleiken døyr av søkinga etter prov. Det å elska har kunsten og det rette skjønn som livskjelde. Slik er det også med fotballen.