Truga av konkurs for andre gong på ei veke
Flaggskipet Bare i Børsen har under ei veke på seg til å betale 200.000 kroner i moms. Det er andre gong på få dagar at restaurantkonseptet er truga av konkurs.
Tysdag sist veke måtte gründerane bak Bare-konseptet møte i Bergen tingrett. Restauranten Bare Vestland hadde vel 300.000 kroner i ubetalt moms, og Skatt Vest ville slå dei konkurs.
Det slapp dei unna med. Dommaren gav dei to veker utsetjingsfrist på å betale.
Konkurstruga igjen
No er gründerane nok ein gong kalla inn til retten for same høve, men for den andre restauranten, flaggskipet Bare i Børsen AS. Denne restauranten ligg nokre etasjar over i det gamle børsbygget i Vågsallmenningen i Bergen sentrum og har uteståande 200.000 kroner i meirverdiavgift til Skatt Vest.
Dette kravet kjem på toppen av det førre kravet gjeldande Bare Vestland, som dei altså må betale innan to veker.
Årsaka til dei økonomiske problema er den same for begge restaurantane, fortel styreleiar Petter Wilhelm Stiegler.
–Dei tre første månadene i året er tunge, seier han.
Selskapet planlegg å betale Bare i børsen AS sin ubetalte moms. I så fall slepp dei å møte i retten i morgon, tysdag.
– Betala mesteparten
Styreleiaren forsikrar at dei allereie har betalt mesteparten av det første momskravet knytt til Bare Vestland, med lokale i kjellaren til børsbygget.
Stiegler fortel vidare at dei likevel ikkje tar opp lån for å betale krava.
–Vi brukar berre pengar frå omsetjinga.
Trass i tidlegare konkursoppmodingar, og den tidlegare restauranten Bare Restaurant som slo seg sjølv konkurs for to år sidan, vurderer ikkje Bare Holding å gjere store endringar i forretningsmodellen.
– Vi starta med lite kapital, og har heile tida bygd oss oppover. Kvart år stig omsetjinga. Pilene peikar oppover, seier Stiegler.
Årsrekneskapen for Bare Vestland viser at omsetnaden har stige, frå vel 7,8 millionar i 2015, til 14,3 millionar kroner i 2016.
Likevel har det vore store underskot. I 2016 var eigenkapitalen negativ med nesten 3,7 millionar kroner.
Stiegler er klar på at det ikkje vert nokre drastiske endringar for å unngå framtidige trugsmål om konkurs.
–Vi kjem ikkje til å stengje Bare i Børsen eller Bare Vestland, legg han til.
Tenar meir om sommaren
Vi starta med lite kapital, og har heile tida bygd oss oppover. Kvart år stig omsetjinga. Pilene peikar oppover.
Då Bare Vestland møtte i retten tysdag sist veke, fortalde styreleiaren at ting ser betre ut. Restauranten skal ha tent ein halv million kroner meir i juni enn det dei gjorde i snitt dei første månadane i år.
Det kom også fram i tingretten at restauranten låg ein månad bak på husleiga, men at dei var i dialog med huseigar.
Vi kjem ikkje til å stengje Bare i Børsen eller Bare Vestland. Petter Wilhelm Stiegler, styreleiar