Departementet opprettheld vernet av Flåmsvassdraget
Slik såg det ut langsmed Flåmsvassdraget etter flaumen hausten 2014. Tiltaka som er gjort, skal tola ein 200-årsflaum. Bjørn Vike, initiativtakar til alliansen «Vern om dei verna vassdraga» er nøgd med Olje- og energidepartementets avgjerd.
Flåmsvassdraget blir ikkje utbygd. Det har Olje- og energidepartementet (OED) bestemt. Men Aurland kommune nektar å sleppa saka.
I eit brev til Aurland kommune datert 21. juni skriv departementet at det etter ei samla vurdering finn «at det ikkje er grunnlag for å fremje denne saka for Stortinget med forslag om å opne for konsesjonshandsaming».
Aurlendingen Bjørn Vike, initiativtaker til alliansen «Vern om dei verna vassdraga», er letta.
– Vernestatusen av Flåmsvassdraget lever vidare. Ei rad enkeltpersonar, reiselivsbedrifter og organisasjonar stilte seg bak alliansen. Fleire sentrale vassdrag på Vestlandet er under press. Opo i Odda, Raundalsvassdraget på Voss og Flåmsvassdraget er mellom desse. Flåmsvassdraget forblir verna, og det skulle berre mangla, seier Bjørn Vike.
– Gledeleg
– Meir enn ein million turistar oppsøker vassdraget kvart år. Ingen andre vassdrag i Europa kan visa til liknande besøkstal. Det ville vatnet er ein del av identiteten til oss som bur her, og til heile landet. Derfor er det gledeleg at styremaktene set vernestatusen så høgt og ikkje temmer vassdraga våre, seier Bjørn Vike, som er vertskap for ein stor vassdragskonferanse i Aurland i september.
– Det er brukt titals millionar kroner på å flaumsikra Flåmsvassdraget, og det blir arbeidd med andre flaumdempande tiltak. Dette vil bli sentrale tema på vassdragskonferansen, seier Vike.
Konferansen, i regi av Naturvernforbundet, vil bli gjennomført etter planen, sjølv om Flåmsvassdraget altså ser ut til å vera redda frå utbygging med OEDs avgjerd.
Må ha Stortingets samtykke
Det var i eit brev til OED 1. november 2016 Aurland kommune bad om at det vart opna for konsesjonshandsaming av flaumdempande tiltak i Flåmsvassdraget. I brevet viser kommunen til ei vurdering gjort av konsulentselskapet Multiconsult. Konsesjonshandsaming kan det ikkje opnast for utan samtykke frå Stortinget etter at vassdraget vart varig verna i verneplan II (1986). Vassdraget har dessutan status som nasjonalt laksevassdrag.
Flaumen hausten 2014 gjorde stor skade på bygningar og infrastruktur i Flåm. Trass i at det er blitt gjort omfattande sikringstiltak i vassdraget i etterkant av flaumen, dimensjonert for å stå imot ein 200-årsflaum, meiner Aurland kommune at det framleis er stort potensial for skade på eksisterande infrastruktur, og at flaumfaren er til hinder for vidare utvikling.
Ber om ny vurdering
Det ville vatnet er ein del av identiteten til oss som bur her, og til heile landet.
Bjørn Vike, initiativtaker til alliansen «Vern om dei verna vassdraga»
– Vi har sendt brev til statsråden med oppmoding om at det blir gjort ei ny vurdering. Vi meiner vi har god dokumentasjon på at det framleis er flaumfare i vassdraget, og at det er mogeleg å redusera skadeomfanget med tiltak.
Det seier ordførar i Aurland, Noralv Distad (H). Han er sikker på at han og kommunestyret handlar på vegner av eit fleirtal av innbyggjarane i kommunen når dei held fram kampen for å sikra vassdraget mot øydeleggjande skadeflaumar, lik den hausten 2014.
«Aurland kommune kan ikkje slå seg til ro med konklusjonen frå NVE og departementet, og vil arbeida vidare med saka», heiter det i eit brev til statsråd Søviknes som Distad har signert. Brevet vart sendt 26. juni.
– Ein flaum lik den vi opplevde i 2014, gjer eit sterkt inntrykk. Det er viktig å syta for at noko slikt ikkje gjentek seg. Vi har eit ansvar for innbyggjarnes liv og helse. Då må vi gjera alt vi kan for å få utgreidd tiltak. Dette har vi brukt mykje tid og ressursar på, og vi slepp derfor ikkje tak i saka, seier Distad.
Vi meiner vi har god dokumentasjon på at det framleis er flaumfare i vassdraget. Noralv Distad, ordførar i Aurland