– Eg sa til meg sjølv: Eg skal ikkje døy her
Jurgen Klaus (75) fortel at han aldri fekk panikk då han falt ned i ein smeltesprekk på Folgefonna. No takkar han redningsmannskapa for at han er i live.
Frå sjukesenga fortel den kanadiske turisten om kva som skjedde då han fall ned i ein vel 15 meter djup sprekk ved Folgefonna.
Laurdag ettermiddag var Klaus på veg tilbake til skihytta ved sommarskisenteret, etter først å ha gått seg vill.
– Eg hadde veldig vondt
Klaus braut minst fire ribbein, fekk fleire mindre brot i ryggen og punkterte ei lunge i fallet.
– Eg datt og banna, og sklei hovudstups ned i sprekken, fortel han.
Sekken på ryggen tok noko av fallet. Og godt var det. Men den gjorde og at han kilte seg fast.
Redda av mobilen
Då Hordaland alpine redningsgruppe kom til Folgefonna, søkte fleire helikopter allereie etter Klaus.
Heldigvis hadde han både straum og dekning på telefonen, men han visste ikkje kor han var.
Ved å lytte til støyen frå rotorane, fekk 75-åringen kommunisert posisjonen sin til nødoperatøren, som igjen kommuniserte med helikopteret.
– Det hadde vore mykje meir komplisert å finne han om han ikkje hadde hatt telefon, seier Lars Mjaasvatn frå Hordaland alpine redningsgruppe.
– Eg hadde veldig vondt og sa til meg sjølv: Eg skal ikkje døy her, fortel 75-åringen.
Mjaasvatn var nede i sprekka saman med ein person frå redningshelikopteret.
– Det er ikkje uvanleg at det skjer med uerfarne fjellfolk og turistar, seier han.
Enorm meistringskjensle
Mannskapet
frå
redningshelikopteret og Hordaland Alpine redningsgruppe fekk ein triangelsele ned til Klaus, og firte seg ned i sprekken.
– Slikt må skje effektivt og skånsamt, fortel Mjaasvatn.
Sakte, men sikkert heisa dei Klaus opp til overflata.
– Når vi lykkast med å berge nokon, får eg ei enorm meistringskjensle, seier Mjaasvatn.
Fleire ulukker i finvêret
Klaus skjønte ikkje kor glatt snøen var ved sprekka, før han sklei og fall ned i mørket.
Dei alpine redningsgruppene jobbar frivillig som hjelpekorps og har saerskilt kunnskap om redningsaksjonar i vanskeleg fjellterreng og på brear.
Leiaren deira i Hordaland, Stein Falsen Møller, har merka ein auke på talet i utrykkingar.
– Når det er mykje fint vêr, sommarferie og turistsesong, er det veldig mange ute i ulendt terreng. Fleire er ikkje godt nok skodde til å ferdast i røff, norsk natur. Då aukar ofte talet på hendingar proporsjonalt med aktiviteten, seier han.
Vil tilbake til Noreg
Til trass for ulykka seier 75-åringen at han er imponert over nordmenn og innsatsen som blei lagt ned av redningslaget. Han kjem gjerne tilbake.
– Eg vel å sjå på det som ei positiv erfaring. Alle har tatt godt vare på meg, seier Jurgen Klaus.