Ein fjordbuss
Bølgjene på Sørfjorden har fått kvite skumtoppar på. Det skummar friskt om bord på «Midthordland» òg.
– Heilt avgjerande, seier Helge Andersen om trafikken mellom bar og salong.
– Utan desse blåturane hadde det nok ikkje gått rundt.
Det er fredag, helgestart og feriestemning. 110 feststemte gjester har fylt salongane på den gamle fjordbåten. Framfor baugen ligg fjorden glitrande vakker i solsteika. Alt ligg til rette for nok ein vellukka blåtur med ein av fjordens trufaste travarar. No med nytt liv som siglande festlokale.
Fiksa for 6,7 millionar
Helge Andersen er ein av dei 13 osingane og tysnesingane som i 2009 kjøpte «Midthordland» og sikra at ho framleis skal pløya bølgjene i fjordane rundt Bergen. 4,2 millionar kroner var prisen. Sidan den gongen har Riksantikvaren løyvd 6,7 millionar kroner til rehabilitering av skuta, som i 1995 fekk status som verneverdig. Det meste under vasslinja er skifta ut, stålet inkludert. Dekket framme er nytt og frå furuskogane ein plass i Os er ny mast henta.
– Mest mogeleg autentisk. Alt arbeid er utført i tråd med Riksantikvaren sine pålegg og ønskjer, mykje av det på dugnad, seier Andersen, der han stolt viser rundt, både inne og ute.
Frå Stord Verft
«Midthordland» er ein av fjordbussane som trafikkerte bassenget rundt Os og Tysnes frå krigens slutt og i tiåra framover. Jomfruturen vart gjennomført 5. desember 1947. Den slanke farkosten, som i sine velmaktsdagar gjorde 16 kvikke knop,