Borge klar for finale
– Før sesongen hadde eg ikkje sett på det som ei mogelegheit, seier spydkastaren.
Førre helg drog Borge til med
62 meter på heimebane. Laurdag fekk ikkje spydkastaren heilt dei same lengdene under Diamond League i London.
– Eg kjente meg betre i dag enn førre laurdag, men teknikken stemte ikkje, seier Borge til BT på telefon.
Borge blei nest sist i Diamond League i London laurdag ettermiddag. Kinesiske Lyu Huihui vann konkurransen med 65.54 meter, føre Nikola Ogrodníková og Kelsey-Lee Roberts på 65.36 og 64.11 meter.
56.06, 54.95, 57.12, 55.58 meter og to daude kast blei resultatet til spydkastaren frå Osterøy.
– Vinkelen stemte ikkje, eg opna meg for mykje og hofta var ikkje høg nok, seier Borge.
– Kjempesesong
Sjuandeplassen skaffa ho likevel nok poeng til å nå finalen i Diamond League, som går i slutten av august i Zürich og Brussel.
– Før sesongen hadde eg ikkje sett på det som ei mogelegheit, men etter kvart blei det målet, og det var godt nok til å koma med, seier Borge.
– Det er ikkje mange som når finalen, så det er stort. Det betyr at ho er topp-åtte i verda i Diamond League. Sigrid har hatt ein kjempesesong og er resultatmessig meir stabil enn tidlegare. Me manglar berre det eine, gode kastet, seier trenaren hennar, Helga Reigstad.
– Ofte det beste
Med full klaff kan det kastet koma om to veker. Då ventar årets høgdepunkt, EM i Berlin.
– No blir det teknikktrening framover, for å sørgja for at den sit og er stabil, seier Reigstad.
Borge opna sesongen godt og tok EM-kravet allereie i mars då ho kasta 62.42 meter i portugisiske Leiria. Lengda er også spydkastaren sitt beste kast denne sesongen. No blir det trening på Osterøy fram til avreise til EM.
– Å trena i vanlege omgivnadar er ofte det beste. Me veit kva me skal jobba med.