Flytta 30 campingvogner på Voss
Vangsvatnet steig så raskt laurdag kveld, at campingvogneigar Øyvind Kårbø fekk det veldig travelt.
Minutt for minutt følgde ein gjeng campingvogneigarar med på vatnet, som steig med 20 cm i timen.
Ved 22-tida fekk dei det plutseleg travelt.
– Vi såg at dette ikkje gjekk lenger. Etter ei kort rådslagning heiv vi oss rundt og tok til å evakuere campingvognene, fortel Øyvind Kårbø.
Først flytta han si eiga vogn. Så tok han til å flytta andre sine. Både laurdagsnatta og sundagsmorgonen gjekk med. Då BT snakka med Kårbø sundag føremiddag, var han temmeleg sliten.
– Vi har gjort alt som står i vår makt for å redde ut verdiar. Vi har jobba i heile natt, køyrt ut kring 30 campingvogner og flytta på isocampar med tunge telt i metall. Jammen fekk vi det travelt på slutten!
Noregs vassdrags- og energidirektorat har sendt ut oransje varsel om jord- og skredfare i Hordaland og Sogn og Fjordane. Fargen betyr at det kan oppstå utfordrande situasjonar som flaum og erosjonsskadar på utsette stader.
Det er ikkje første gong campingvognene til Øyvind Kårbø frå Knarvik er i fare. Under 200-årsflaumen på Voss i 2014 kom han for seint.
– Eg hadde ikkje sjanse til å redde ut vogna, som tok inn vatn og vart øydelagt, seier Kårbø, som ikkje legg skjul på at han er irritert på Voss kommune.
– Med enkle grep som sand, kunne kommunen forhindra at vatnet kjem inn på denne måten. Voss kommune gjer veldig lite for campingturistane.
Like før var vossaordførar Hans-Erik Ringkjøb på inspeksjon ved Vangsvatnet.
Sundag klokka 15 registrerte NVE sin målar for vasstand på Bulken eit nivå på 4,97 meter over nullpunktet. Det er 20 centimeter over nivået for tiårsflaum.
– Det er veldig mykje vatn. Det tek til å bli skummelt, og vi går eit spennande døgn i møte, seier Ringkjøb.