Oppkomlingane
Pensjonist i BT TENK AT DET FINST oslofolk som har innsett at dei oppfører seg som nyrike oppkomlingar. Tenk at det gått opp for dei at ei lang rekkje av landets mest påkosta, gamle praktbygningar blir ståande tomme og ubrukte som følgje av ellevill milliardrulling til nybygg. No må dei erkjenna at siviliserte folk ikkje ter seg slik.
Mest heile 1800-talet og store deler av 1900-talet gjekk med for å få omskapa ein fattig provinsby i ein europeisk avkrok til ein nokolunde representativ hovudstad. Resultatet var ikkje spesielt imponerande, sett frå Stockholm og København. Eller frå Bergen. Hytter og hus og ingen borge. Men det var det vi hadde. Inntil det nasjonale krafttaket enda som vrakgods på oljehavet.
TI TOMME, eller snart tomme, gamle, verdslege praktbygningar har Aftenposten talt opp. Pluss eit par handfullar gamle kyrkjebygg. Ingen planar ligg føre for kva som skal skje med kulturarven. Bortsett frå at det gamle og påstått ubrukelege Nasjonalgalleriet visstno kan bli gjenopna som eit slags reservenasjonalgalleri. Fullt brukeleg, faktisk. Etter ny, statleg pengerulling, naturlegvis. Ei pølse i slaktetida. Eit oljefat i Finansdepartementet.
DET ER IKKJE lett å bli rik i ein fart. Ikkje for nokon. Ikkje for vestlendingar heller. Men det er nok ekstra vanskeleg for dei som bur i hovudstaden. Dei har så mykje å ta att. Nordmarka er ikkje nok. Verdas største statsfond i verdas nest største humanitaere stormakt (etter Sverige), stakkarslege 667.000 innbyggjarar og Oslo Metropolitian University er heller ikkje nok.
MEN DET SKAL BLI andre bollar når den nye Operaen og det nye Munch-museet og det nye Nasjonalmuseet og det nye Deichmanske hovudbibliotek (pluss Barcode og Sørenga og stakkars gamle Aker Brygge og Tjuvholmen) er samla på eitt brett. I god fråstand frå den fattige fortida. I verdas mest nyrike hovudstad.
Vi som bur i provinsen er sparde for mykje sut og strev. Men det ville vera greitt om oppkomlingane sette av nokre smular frå dei rikes bord til å ta vare på vår småkårsaere.