DOKTORGRAD

Økonomisk evaluering av malariaførebygging i Etiopia

Alemayehu Hailu disputerer 16.11 for ph.d.-graden ved UiB med avhandlinga «Economic evaluation of malaria prevention in Ethiopia: Economic burden, equity, and cost-effectiveness analysis of malaria prevention in south-central Ethiopia».

Det har vore oppsiktsvekkjande framskritt det siste tiåret i den globale kampen mot malaria. Om lag 70 prosent av framgangen kan tileignast enkelttiltak, som sengenett behandla med insektmiddel, og kampanjar for å behandle bustadhus med insektmiddel. Trass i dette held sjukdommen fram med å vere ei stor utfordring for helsetenestene i mange land i Afrika, og vi har lite kunnskap om dei økonomiske verknadene av malariaførebygging. I tillegg veit vi ikkje om sengenettkampanjer og kampanjar for behandling av bustadhus vil auke eller redusere ulikskap i helse.

I avhandlinga viser Alemayehu Hailu at malaria representer ein stor økonomisk byrde for fattige hushald i Etiopia. Han konkluderer at førebygging av malaria kan bidra til å overvinne fattigdom. Han finn også at berre få hushald i området eig utstyr for å forhindre malariasmitte, slik som sengenett, og at desse i størst grad er å finne hjå dei mest velståande hushalda.

I forskinga si har Alemayehu Hailu utvikla to modellar for å evaluere kor kostnadseffektivt det er å kombinere utdeling av sengenett med å behandle bustadhus med insektmiddel. Ein modell er basert på resultata frå ein randomisert studie i Etiopia, og den andre modellen er basert på ei kunnskapsoppsummering. Modellane gir informasjon som er relevant for å anbefale kva tiltak som er hensiktsmessig i område med ulik malariabyrde.

Alemayehu Hailu har ein mastergrad i folkehelse frå Addis Abeba Universitet. Han er seniorrådgjevar ved helsedepartementet i Etiopia. Disputasen finn stad 16.11 kl. 11.15 i BB-bygget.