Varaordførar bruker sørstatsflagg på bilen
Den nye varaordføraren i Bjørnafjorden kommune køyrer rundt med sørstatsflagg på bilen. Eit halvrasistisk symbol, i beste fall, seier professor.
Biletet over viser Harald Lekven (Sp), påtroppande varaordførar i Bjørnafjorden kommune, som køyrer i 4. juli-kortesje for nokre år sidan. På taket av bilen har han to flagg, det amerikanske flagget og sørstatsflagget.
Varaordføraren har også sørstatsflagget som klistremerke på bilen sin, like ved sida av Senterparti-logoen.
Sørstatsflagget er sterkt omdiskutert, på grunn av tilknytinga til den amerikanske borgarkrigen, slaveriet og det rasedelte samfunnet. Det blei også brukt av gruppa Ku Klux Klan som sto for kvit overmakt.
Dei seinare år har debatten om flagget blussa opp igjen i USA, etter høgreekstreme massakrar og opptøyar der det er blitt brukt. Samstundes vaiar det framleis frå flaggstenger i fleire amerikanske statar.
– Arv, ikkje hat
Lekven seier at han har fleire effektar med sørstatsflagg på.
– Eg har tilhøyrt Amcarmiljøet i fleire år, og har vore fleire gonger på ferie i sørstatane. Eg har veldig sansen for levesettet og kulturen. Alt går litt langsamare, folk har tid og er høflege. Og eg ser parallellar hit til Os. Me vil vere uavhengige, vil ha det som me har det, utan å bli pålagt at miljøet skal endra seg og bli urbant, seier Lekven.
Han seier at flagget for han ikkje er knytt til rasisme og slavetid.
– Mange prøver å knytte flagget til rasisme og slavetid. Sjølvsagt er det ei historie der òg, men eg kjøpte effektane av ein afroamerikanar. Han forklarte at «it’s heritage, not hate». Det har eg teke med meg, og brukt som argument.
– Ein klar politisk bodskap Professor Ole O. Moen er ekspert på amerikansk historie. Han seier sørstatsflagget er eit svært betent symbol, tett knytt til høgreekstremisme.
– Dei som brukar flagget snakkar gjerne om det som ein historisk arv, og meiner det ikkje har noko med rasisme å gjere. Men den djupare meininga er rett og slett at ein ønskjer seg tilbake til det samfunnet som var, og i sørstatane handlar det om eit samfunn med raseskilje, seier han.
Moen seier flagget er brukt i fleire miljø i Norge. Men også
Sjølvsagt er det ei historie der òg, men eg kjøpte effektane av ein afroamerikanar. Han forklarte at «it’s heritage, not hate». Det har eg teke med meg, og brukt som argument. Harald Lekven (Sp), påtroppande varaordførar i Bjørnafjorden kommune
her i Norge, meiner professoren at flagget har ei politisk tyding.
– Symbolverknaden er halvrasistisk, i beste fall. Å køyre rundt med dette på bilen i Norge vil eg seie har ein klar politisk bodskap om at ein er imot det fleirkulturelle samfunnet, seier professoren.
Vil ikkje fjerne flagget
– Eg kjenner den delen av historia, og eg tar sjølvsagt avstand frå rasisme, seier Lekven.
– Men eit flagg og eit symbol kan alltid bli misbrukt. Både norske og svenske flagg blir brukt på ytre høgreside. Men dei er jo symbol frå områda dei representerer, seier han.
– Men som politikar, kva syns du om å bli assosiert med raseskilje og kvit overmakt?
– Det syns eg sjølvsagt er trist, men det vil vere heilt absurd for meg å la meg presse til å ta dette flagget av. Dette er ei lovleg vare. Eg beklagar om nokon blir støtt, men eg vil ikkje bu i eit samfunn der eg blir pressa.
– Eg er ein litt meir offentleg person no, men eg kan ikkje utslette kven eg er og kva eg står for. Det vil kjennast som eit stort nederlag for demokratiet.
– Kva tenkjer du om professor Ole Moen som seier dette sender bodskap om at ein er imot eit fleirkulturelt samfunn?
– Det må han gjerne forfekte. Eg er fullstendig ueinig.
– Tek avstand frå rasisme Leiar Sigurd Reksnes i Vestland Senterparti seier til BT at han ikkje har reflektert over sørstatsflagget.
Etter å ha snakka med Lekven seier leiaren at han kjenner seg roa.
– Forklaringa hans var at han er glad i amerikanske bilar og musikk, og at han på det sterkaste tar avstand frå segregering og rasisme. Eg held meg til det, seier Reksnes.
– Kva tenkjer du om signaleffekten det sender?
– Eg held meg til det svaret han gav.
– Han må svare sjølv Påtroppande ordførar i Bjørnafjorden, Trine Lindborg frå Arbeidarpartiet, har inga meining om at varaordføraren ho skal jobbe med køyrer med sørstatsflagg.
– Eg veit han er veldig interessert i amerikanske bilar og historie. Eg hadde nok verken hatt den bilen eller det flagget, sjølv, seier ho.
– Kva tenkjer du om signaleffekten av å ha eit slikt flagg på bilen?
– Det må han svare for sjølv.