– Større vilje blant høgreekstreme til å bruke terror
Ei høgreekstrem terrorhandling i Noreg er no like sannsynleg som terror frå ekstreme islamistar, meiner PST.
Det er mogleg at høgreekstreme eller ekstreme islamistar vil prøve å utføre eit terrorangrep i Noreg i 2020. Trusselen er like stor frå begge, slår Politiets tryggingsteneste (PST) fast i den nasjonale trusselvurderinga si.
PST definerer ordet «mulig» som at «det er like sannsynlig som usannsynlig».
I 2019 var ekstrem islamisme rekna som den største trusselen, men trusselen frå høgreekstremisme i Noreg har utvikla seg i negativ retning gjennom året som gjekk, ifølgje PST. Dei viser mellom anna til terrorangrepet mot Al-Noor-moskeen i Bærum i sommar.
Høgreekstreme viser i aukande grad vilje til å bruke terror for å nå måla sine. Trusselen frå høgreekstreme vil først og fremst kome frå enkeltpersonar, ikkje frå grupper, meiner PST.
Større vilje til terror Tryggingstenesta ventar at høgreekstremistar vil utnytte ei eventuell auka innvandring til å styrkje oppslutninga si og til å legitimere terror.
– Det er òg sannsynleg at ein eventuell auke i talet på ekstreme islamistiske terroraksjonar i Vesten i 2020 vil bli brukt til å legitimere nye høgreekstreme hemnaksjonar, heiter det i trusselvurderinga.
Omfanget av radikalisering til ekstrem islamisme i Noreg er lågt, noko som blir venta å halde fram i 2020.
PST peikar òg på at talet på ekstreme islamistiske terrorangrep mot Vesten har gått dramatisk ned samanlikna med 2017. Likevel er det fleire forhold som kan skjerpe denne trusselen i 2020.
– Fleire handlingar som blir oppfatta som krenkingar av islam, kan til dømes raskt føre til auka radikalisering, meiner PST.
Kina, Iran og Russland
I tillegg blir spionasje mot regjeringa, Stortinget og Forsvaret og digital kartlegging og sabotasje av kritisk infrastruktur nemnt som truslar.
Russland, Kina og Iran har størst skadepotensial, slår PST fast. Men også andre statar kan påføre både norske verksemder og einskildindivid skade.
Stadig meir av trusselaktiviteten føregår digitalt.
– Dette er ei utvikling som påverkar trusselbiletet på alle ansvarsområda til PST, blir det slått fast.