Luftambulansen i knipe: Står utan landingsplass
Bergen kommune vil ha ambulansehelikopterbasen vekk frå Grønneviksøren. Men begge dei føreslåtte tomtealternativa er ueigna, ifølgje Helse Bergen.
På Grønneviksøren, sør for Store Lungegårdsvannet, landar ambulansehelikopter med pasientar som skal til Haukeland universitetssjukehus. I 18 år har Helse Bergen leigd dette området av Bergen kommune for å frakte pasientar til og frå sjukehuset.
Men avtalen er berre midlertidig. Bergen kommune skal bygge bustader langs sjølinja, og helikoptertrafikken må difor bort.
– Det fungerer bra å vere på Grønneviksøren, men vi har i lang tid vore på jakt etter ei permanent løysing, seier Geir Egil Pedersen, avdelingsleiar på prosjektkontoret i Helse Bergen.
Bergen kommune har gitt helseføretaket tilbod om å kjøpe tomt på Nygårdstangen, like ved brannstasjonen. Området er regulert for helikopterbase.
Men utgreiingar viser at tomta er dårleg egna til dette, blant anna fordi køyrerampe til basen vil kome i konflikt med brannstasjonen og motorvegrampe. Statens vegvesen meiner landingsplassen er problematisk med omsyn til trafikktryggleiken og tilrår at prosjektet vert skrinlagt.
Området er også for lite til at ein tankbil kan snu, og det
vil krevje fylling av store steinmassar i sjø for å innfri desse krava.
– Svært uheldig
Helse Bergen har difor undersøkt mogelegheita for å flytte ambulansehelikopter-basen til Flesland. Men dette blir sterkt fråråda av Luftambulansetjenesten. Dei meiner at basen bør ligge nært Haukeland universitetssjukehus.
– Føremålet med å bruke helikopter i ambulansetenesta er å kome raskt fram til pasien
ten, og frakte pasienten raskt til sjukehuset der pasienten kan få betre behandling. Tidsbruken er vesentleg. Dersom ein flytter basen til Flesland vil responstida ved utrykking auke, samtidig som det tar lenger tid å frakte pasienten til sjukehuset, seier Kyrre Humblen, rådgjevar i Luftambulansetjenesten.
I dag tek det cirka tre minutt med ambulansebil frå Grønneviksøren opp bakken til Haukeland. Frå Flesland, særleg i periodar med rushtrafikk, vil tidsbruken bli vesentleg utvida.
Eit anna problem med å flytte basen til Flesland er at ambulansehelikoptera sine avgangar og landingar må tilpassast anna lufttrafikk.
Fordi lege og redningsmannskap må bruke meir tid på transport mellom Haukeland og Flesland vil dei raskare nå maksimal arbeidstid, som pålegg kvile. Då må helikopteret stå på bakken.
– Er det fare for pasienttryggleiken ved flytting av basen til Flesland?
– Det er risiko for auka utrykkingstid; at det tek lenger tid før pasienten får hjelp og kjem til sjukehus. Vi ser det som svært uheldig for tenesta, seier Humblen.
På tomtejakt
Dermed står Helse Bergen igjen utan gode alternativ til ny helikopterbase.
– Vi er i ein situasjon der vi pr. dags dato ikkje har permanent løysing på baselokalisering. Vi har difor bedt Bergen kommune om dialog for å undersøkje mogelegheitene for anten å bli på Grønneviksøren eller om det er andre tomtealternativ tilgjengeleg, seier Pedersen.
Det er også landingsplass for helikopter på taket til Haukeland universitetssjukehus, som kan brukast i tilfella der det hastar mest. Støypåverknad gjer at dette ikkje kan vere den einaste landingsplassen.
Dersom Helse Bergen ender opp med base som ligg langt unna Haukeland, vil det bety fleire landingar på sjukehustaket framover, seier Pedersen.
Får ikkje bli
Bergen kommune blei nyleg orientert om at Helse Bergen ikkje ser seg tent med Nygårdstangen som ny base.
– Vi registrerer det og ser at det kan bli vanskar med å bygge på tomta som vi har regulert til formålet. Dette er skuffande og overraskande. Vi må gå i dialog med Helse Bergen og sjå om det er noko vi kan gjere i reguleringsplanen som kan legge til rette for at den likevel kan brukast, seier Bjørn Arne Olsen, spesialrådgjevar i eigedomsavdelinga i Bergen kommune.
Det er ikkje aktuelt å la basen bli på Grønneviksøren.
– Vi held på med ein stor reguleringsplan for familiebustader i området. Det er ikkje forenleg med helikopter i bustadområde. Planen er at dei første bebuarane skal flytte inn i 2023, seier Olsen.
– Er det andre tomter som er aktuelle?
– Det må vi vurdere saman med Helse Bergen. Vi skal vere behjelpelege, men det blir ikkje lett. Vi har brukt mange år på å regulere Nygårdstangen til dette formålet.
Tidsbruken er vesentleg. Dersom ein flytter basen til Flesland vil responstida ved utrykking auke, samtidig som det tar lenger tid å frakte pasienten til sjukehuset.
Kyrre Humblen, rådgjevar i Luftambulansetjenesten.