Fjaler bryt lova i oppfølginga av Ann Jeanette
Fjaler kommune bryt lova i oppfølginga av Ann Jeanette Yndestad, konkluderer Fylkeslegen.
– Veldig, veldig slitsamt
– Eg går med eit trykk inni meg. Det er veldig, veldig slitsamt, seier Oddleif Yndestad.
Han er far og verje til Ann Jeanette Yndestad (39), som er psykisk utviklingshemma. Ho sit i rullestol og kommuniserer med få ord.
Ann Jeanette bur i eigen bustad i Dale i Fjaler kommune, der ho har personell kring seg heile døgnet.
Denne dagen er ho på besøk hos foreldra i barndomsheimen på Guddal.
Popkorn og kaffi
– Sitte!, ropar ho til faren, eller «kallen», som ho kallar han. Han er rask på plass i sofaen, tett inntil.
Det er faste rutinar når Ann Jeanette er på besøk. Popkorn og kaffi, twist og kos.
Ann Jeanette prikkar faren på ryggen, han legg armen kring og kyssar ho på kinnet.
– Fortryllande hønemor, seier Oddleif til dottera si.
– Ann Jeanette er ei humørfylt jente som er glad i folk. Viss ho har ro rundt kring kan ho snakke og gjere seg forstått. Men viss ho er utrygg, sjølvskadar ho seg, seier han.
Beit seg i armen
Familien har i lang tid reagert på oppfølginga ho får og har sendt mange klagar til kommunen.
Det toppa seg natt til 18. mai i fjor, då Ann Jeanette måtte leggast inn på sjukehus etter ein alvorleg episode med sjølvskading.
Då hadde ho bite av store hudbitar på overarmen, utan at nattevakta frå kommunen greip inn eller tilkalla bistand. Skadane utvikla seg til betente sår i djupe groper. Etter dette kontakta familien fylkeslegen.
– Kommunen ville først ikkje gje oss innsyn i journalen frå denne natta, men i januar kom det fram at hendinga ikkje var journalført. Det er eit graverande brot. Kva skjedde denne natta? Den må ha vore grusom for henne, seier Nina Yndestad, syster til Ann Jeanette.
Har overordna ansvar
«Ann Jeanette Yndestad får ikkje forsvarlege tenester. Fjaler kommune er kjent med utfordringar og svikt i tenesteytinga, men har ikkje sett i verk tilstrekkelege tiltak for å rette opp i den uforsvarlege praksisen».
Det skriv fylkeslege Helge Arianson i tilsynsrapporten som konkluderer med at Fjaler kommune bryt helse- og omsorgstenestelova.
Det siste året er det selskapet Aberia, på oppdrag frå kommunen, som har ytt tenestene. Det er likevel kommunen som har det overordna ansvaret, understrekar fylkeslegen.
«Gjennomgåande svikt»
Fylkeslegen konkluderer med at det er «gjennomgåande svikt» i styringa i Fjaler kommune. Ho peiker på ei rekke kritikkverdige forhold:
Tilsette i tiltaket har ikkje fått tilstrekkeleg opplæring og rettleiing i bruk av tvang og makt. Det har ført til at Ann Jeanette har skada seg sjølv utan å verte
stoppa. Dette skulle vore avdekt og kommunen skulle ha gripe inn og korrigert tenestene.
Fjaler kommune har ikkje styringssystem for å ha nødvendig kontroll med tenestene. Tilsynet viser omfattande bruk av vikarar med varierande kompetanse.
Det er uklart på kva måte kommunen følgjer med på at Ann Jeanette får dei medisinane ho skal ha til ei kvar tid.
– Medisinar vert gløymt
Ann Jeanette har tuberøs sklerose og epilepsi og er avhengig av daglege medisinar.
Familien er fortvila fordi dei opplever at Ann Jeanette ikkje alltid får nødvendig legetilsyn eller medisinar, eller at medisinen vert gitt på eit anna tidspunkt enn det legen har forskreve.
– Kommunen har flotte rutinar, men problemet er at dei ikkje blir følgt. Medisinar vert gløymt, og det er stor gjennomtrekk i bemanninga. Ho vert utrygg av ukjente og då aukar sjølvskadinga, seier Oddleif.
Vil ikkje kommentere
Allereie i mars gjennomførte fylkeslegeneit møte med alle partane i saka.
Ifølgje fylkeslegen var det då semje om at tenestene til Ann Jeanette Yndestad ikkje var forsvarlege.
Fylkeslegen etterlyste mellom anna rutinar for informasjonsutveksling, ansvarsfordeling og medikamenthandtering.
BT har vore i kontakt med Fjaler kommune for å få svar på kvifor dei ikkje har sett i verk tiltak når dei har vore klar over situasjonen.
Vi har også spurt kva dei vil gjere for å følgje opp vedtaket frå fylkeslegen.
– Fangar opp feil
Kommunaldirektøren viser til teieplikta, som familien ikkje har vore villig til å oppheve.
– Sidan pårørande og verje ikkje vil frita meg for tausheitsplikt, vel eg ikkje å kommentere saka i det heile, skriv kommunaldirektør Bente Nesse i e-post til BT.
Aberia, ved distriktsleiar Birthe Skar, seier dei leverer sine tenester i tråd med kontrakten med Fjaler kommune.
– På generell basis har vi system i alle våre avdelingar som fangar opp feil med medisinering, seier Skar, som ikkje vil kommentere denne saka nærare.
Vil ha auka bemanning
I vår søkte familien om auka bemanning for Ann Jeanette, men har ikkje fått svar frå kommunen.
I dag har ho vedtak om ein til ein-oppfølging, men familien meiner det bør vere to på jobb samstundes.
– Det er for krevjande for personalet å stå åleine i så omfattande utagering og sjølvskading. Kommunen må sikre kompetent personell og nok ressursar, seier syster Nina Yndestad.
– Forventar grep
Familien sitt inntrykk er at både Aberia og Fjaler kommune ser på dei som vanskelege pårørande.
– Det kan vere, men det er vår fordømte plikt å sjå til at Ann Jeanette får det ho skal ha, seier Ronny Yndestad Fløholm, svogeren til kvinna.
Familien håper at rapporten frå fylkeslegen vil føre til positive endringar for henne.
– Det er ein knusande og oppsiktsvekkande rapport. Eg forventar at Fjaler kommune straks tek kontakt for å forbetre tilhøva. Her må Fylkeslegen følgje opp, seier faren.