POLITIKK: Inntrykket ein sit igjen med, er at Roger Valhammer gav frå seg styringa av Bergen på eit heilt kritisk punkt.

MELLOM 28. FEBRUAR til 12. mars i år blei heilt spesielle avgjersler tatt i Bergen kommune. Arrangement med over 100 personar blei forbode. Barnehagar og skular blei stengde. Det er nokon av dei mest inngripande avgjerslene som er tatt i nyare historie i kommunen. Men det som gjer dei endå meir spesielle, er at dei på papiret er ikkje tekne av den øvste, valde leiaren i kommunen. Dei er tekne av ein byråkrat.

I LENGRE TID HAR BT prøvd å finne ut kva som skjedde då koronapandemien nådde Bergen og byen fekk kriseleiing. Alle skriftlege kjelder frå den første tida peikar i same retning: Det var administrativt tilsette som tok over. Byrådsleiar Roger Valhammer (Ap) er ikkje ein gong ført opp som medlem i styringsgruppa i den første tida.

I staden var det kommunaldirektør Robert Rastad som styrte kriseleiinga. Både han og Valhammer seier i etterkant at referata er mangelfulle, og at Valhammer sat rundt bordet og tok alle viktige avgjersler. Det er i så fall sterkt kritikkverdig at skriftleg dokumentasjon frå denne perioden er så mangelfull. Skriftlege kjelder er det ein kan gå tilbake til i etterkant.

DET BETYR NOKO kven som faktisk styrer byen. Dei skal vere nokon folket i Bergen kan halde ansvarlege, som representerer politikarane som er demokratisk valde. Ingen kan halde ein toppbyråkrat ansvarleg. Byrådet, med Roger Valhammer i spissen, svarer for det som er gjort.

I Bergen har Valhammer og byrådet ansvaret for den daglege drifta av kommunen. Same dag som skular og barnehagar blei stengtde, møttest byrådet for mellom anna å utvide skjenkeløyvet til fleire restaurantar i byen, samt å godkjenne nytt innhald i eit arrangement som skulle gå inn i 950-års jubileet til Bergen.

Roger Valhammer gav frå seg styringa av Bergen på eit heilt kritisk punkt.

Då verkar det heilt uforståeleg at dei ikkje også har teke avgjersler om handteringa av koronapandemien.

DEI MANGE FORKLARINGANE og påstandane om uriktige referat, gjer det vanskeleg å konkludere med kva som faktisk skjedde då Bergen blei stengt ned.

Men inntrykket ein sit igjen med, er at Roger Valhammer gav frå seg styringa av Bergen på eit heilt kritisk punkt.