Alle restaurantar må nå føre liste over spisegjestane sine
Restaurantar og barar i Bergen må føre liste over besøkjande for å hindre smittespreiing.
«Vent for å få tildelt bord», står det på skiltet ved inngangen til restauranten i Skostredet.
Det er lunt i lokalet til Villani måndag kveld. Utanfor plaskar regnet.
– Beklagar, du er nøydd til å sprite henda først, seier restaurantsjef Giardina Ibtissam venleg til ein gjest som er på veg inn i restauranten.
Dei fleste som kjem hit har bestilt bord på førehand. Dei som ikkje har gjort det, får ikkje bord i restauranten utan vidare.
Vilani har innført ein ny regel.
– Vi skal ha namn og telefonnummer på éin i følgjet uansett, forklarer Ibtissam.
– Personvern er underordna Studentar har dominert smittestatistikken i Bergen dei siste vekene. No brer smitta seg også elles i byen.
I løpet av den siste veka har seks uteplassar og restaurantar i Bergen stengt dørene på grunn av koronasmitte.
Tysdag sette Bergen kommune krisestab på grunn av smitteutbrotet. Det siste døgnet er no 42 personar bekrefta smitta. Totalt er smittetalet oppe i 1028 sidan studiestart.
– Vi er no i ein situasjon der vi er nøydde å avgrense smitta. Vi er nøydde til å slå ned dette utbrotet. Og vi meiner at viss vi lykkast med det i ein tidagersperiode, så kan vi unngå sterkare tiltak seinare, sa byrådsleiar Roger Valhammer (Ap) då dei nye smitteverntiltalene vart presentert tysdag kveld.
Eit av tiltaka som blei bestemt var at alle barar og restauranten må føre lister over besøkjande, slik som restauranten Villani allereie gjer.
Det betyr at du ikkje kan gå ut å ta ein øl eller ei kaffi utan å skrive namnet ditt på ei liste. Medisinsk fagsjef Trond Egil Hansen seier personvern er blitt vurdert som underordna for å sikre folk frå ytterlegare smittespreiing.
Han legg til at listene berre skal oppbevarast i ti døgn og så destruerast.
Stoppar gjestane i døra Frank O. Ditlaroche er driftsleiar ved Villani i Skostredet. Han fortel at dei bestemte seg for å gjere eit nytt grep ved restauranten for kring to månader sidan.
Alle som ikkje har reservert bord før dei kjem, blir no stoppa i døra. Minst éin av gjestane i følgjet blir registrert med namn og telefonnummer før dei får tildelt eit bord.
– Det var jo ikkje noko krav om dette frå styresmaktene si side, men vi såg at det ville vere eit behov for det dersom det viser seg at ein tilsett eller ein gjest er smitta.
Driftsleiaren seier at kring 75 prosent av spisegjestane deira har reservert bord i forkant.
– For dei har vi allereie namn og kontaktinformasjon, men ikkje for dei som kjem i døra.
– Vi får utelukkande positiv respons på dette. Nokon lurer på kvifor, då forklarar vi at det blir lettare for oss å kontakte dei dersom noko skulle skje.
Vi skal ha namn og telefonnummer på éin i følgjet uansett.
Giardina Ibtissam, restaurantsjef
– Har gått eit steg vidare
Slik reglane er ved serveringsplassar i dag, kan ein halde ope dersom det er smittemessig forsvarleg.
Det inneber mellom anna at ein må sørgje for at besøkjande og personell kan halde minst éin meter avstand til andre personar. Plassar som har skjenkjebevilling skal servere alkohol ved borda.
Tysdag vedtok Bergen kommune at offentlege arrangement kan maksimalt ha 50 deltakarar, ned frå 200 i dag.
I tillegg er ein pliktig å utarbeide gode rutinar for god hygiene og godt reinhald.
– Det er definitivt varierande korleis dette blir gjort. Ein kan lage så mange rutinar ein vil, men det er dette med å overhalde dei, seier skjenkjekontrollør Terje Gjertsen.
Han seier at det også er særs ulik praksis for korleis for korleis serveringsplassane tildeler bord til gjestane.
– Nokon plassar går ein berre rett inn og finn seg eit bord. Andre plassar blir ein tildelt bord.
Set pris på reglane
Han seier han kjenner til nokre få plassar som registrerer namn og telefonnummer på gjestane, slik som Villani i Skostredet.
– Men det er ikkje mange, seier han.
No må alle gjere det. Gjestane som BT snakkar med på Villani, set pris på reglane restauranten har innført.
Anette Reite, Karl Børre Reite og dottera Ingrid sit ved eit bord inst i lokalet til restauranten Villani.
Anette og Karl Børre var usikre på om dei skulle besøkje dottera på grunn av den aukande smitten i Bergen.
– Det er bra dei har dette tiltaket. Då har dei oversikt, og ein får beskjed om det har vore nokon sjuke her, seier Karl Børre Reite.
Tiltakene som byrådet i Bergen kommune lanserte tirsdag, varer i første omgang i ti dager til og med 18. september.