Ber pårørande halde seg unna
Regelen er maks éin pårørande pr. pasient. Men i verste fall dukkar heile familiar opp på sjukehuset under pandemien.
malfrid.bordvik@bt.no
foto
For å hindre smitte vil sjukehuset ha minst mogeleg folk inn dørene.
Berre pasientar som treng det, kan ta med seg éin følgjeperson, ikkje fleire. Dette har vore bodskapen sidan koronaen kom i mars.
Pasientar blir informert i innkallingsbrev, via SMS og til slutt på plakatar på sjukehuset. Likevel er sjukehuset fullt av pårørande.
– Vi ser at reglane i stor grad ikkje blir følgt. Det er eit problem, seier fagdirektør Marta Ebbing ved Haukeland universitetssjukehus.
Pasientar reagerer
Torsdag er det jamn trafikk inn og ut dørene til sentralblokka på Haukeland. Tidvis hopar det seg opp kø ved spritautomaten. Også bygningsarbeidarar med traller skal gjennom den same døra.
I foajeen sit pasientar, nokre har pårørande med seg. Det er merka opp kva plassar som ikkje kan brukast. Dei fleste tilgjengelege seta er opptatt.
BT er kontakta av pasientar som har reagert på overfylte venteareal, og sjukehuset har fått meldingar om det same.
– Det er vanskeleg å avvise folk som har reist lang veg, og vi vil ikkje at nokon skal oppleve at dei ikkje er velkomne. Men det går ikkje at både mor, far, veslesøster og storebror er med når eitt barn skal undersøkjast, seier Karen E. Lie, avdelingssjukepleiar på hovud- og halsavdelinga.
Kan måtte avlyse timar Alternativet er at sjukehuset må redusere folkestraumen ved å gå ned i talet på timeavtalar.
– Vi ønskjer ikkje å redusere drifta fordi det vil gå utover pasientane. Då vil ventetidene auke igjen, seier Ebbing.
Sjukehuset slit framleis med etterdønningane frå utbrotet i vår, då over 30.000 pasientavtalar blei utsett eller avlyst.
Det har ført til lengre ventetider og fleire fristbrot.
Etter at smitten blussa opp igjen har 19 tilsette på Haukeland fått påvist koronasmitte. 162 tilsette er i heimekarantene.
Ber folk tenkje seg om Klinikkdirektør Evelyn Neppelberg ber alle som skal på sjukehuset om å tenkje seg om før dei tek med seg pårørande. Fagdirektøren understrekar at barn, funksjonshemma, skrøpelege eldre og andre som må ha følgje, skal få ha det. Ved polikliniske undersøkingar er ikkje dette nødvendig å avtale på førehand, men ved besøk til inneliggande pasientar krev det avtale.
Pårørande til polikliniske pasientar kan også støtte på andre måtar, råder fagdirektøren.
– Ein kan følgje til sjukehuset, utan å gå inn. Og lese i journalen via helsenorge.no saman med pasienten etterpå. Vi vurderer og med andre løysingar for å kunne involvere pårørande, seier Ebbing.
Sjukehuset varslar at dei også vil trappe opp igjen konsultasjonar via telefon eller video.
Avbestiller timar
Etter at smitten blussa opp igjen, har fleire pasientar byrja å avbestille timar.
– Det er mange engstelege som ringjer og vil avbestille. Det er dumt; vi ønskjer å utnytte kapasiteten vår, seier Neppelberg, som understrekar at det er trygt å kome på sjukehuset.
Fleire kommunar har oppfordra innbyggarane sine om å unngå unødvendige reiser til Bergen.
– Det gjeld ikkje for sjukehusavtalar. Det er eit høgst nødvendig aerend, slår Ebbing fast.