Biskopen svarer
Oddvar Skre skriv at kyrkja har vore «bakpå» kva angår presteteneste for kvinner. Eg er samd. Den første kvinnelege presten blei tilsett i 1961. Det burde ha skjedd lenge før.
Motstanden mot kvinnelege prestar var då stor i kyrkja. Lenge var motstandarane i fleirtall blant prestane. No er dei i dundrande mindretal.
Det høyrer likevel med til biletet at heile samfunnet har vore «bakpå» når det gjeld å anerkjenne kvinner som likeverdige med menn i arbeidslivet. Den første kvinnelege fylkesmann vart til dømes først tilsett i 1974. Biletet kan også nyanserast ved å vise til at den kyrkjelege misjonsorganisasjonen, Det Norske Misjonsselskap, allereie i 1904 ga røysterett til kvinner i heile organisasjonen. Staten gjorde det same først ni år seinare.
I dag er stoda eintydig slik at Den norske kyrkja seier eit rungande JA til kvinners presteteneste. I bispekollegiet er allereie halvparten kvinner. Denne utviklinga er gledeleg!
Men framleis meiner nokre prestar altså at kyrkja er komen i konflikt med Paulus som ikkje ønskjer at kvinner skal undervise i forsamlinga. Eg tykkjer dette synet ikkje tek den historiske skilnaden mellom Paulus og vår tid på alvor. Det svarar heller ikkje til den grunnleggande jamstellinga mellom kvinne og mann som gjev seg av det samla vitnesbyrdet i Skrifta.
Skal kyrkja no stenge vegen til prestetenesta for dei som ikkje er samde med meg og fleirtalet? Ei slik avgjerd vil vel stempla dei som vranglaerarar. Så alvorleg har dei fleste i kyrkja ikkje tenkt at dette spørsmålet er. Vi må også hugse at verken den katolske kyrkja eller dei ortodokse kyrkjene har opna for kvinner i prestetenesta. 60 prosent av verdas kristne tilhøyrar desse kyrkjene. Kva har tilhøvet til dei og andre kyrkjer som heller ikkje har kvinnelege prestar eller pastorar, å seie for vår vurdering?
Når det gjeld Sogndal, så skjønar eg at foreldra reagerer. Men våre medlemer kan ikkje velje fritt kva for ein prest dei vil møte ved dåp, konfirmasjon, vigsel og gravferd. Det ville opne for uhaldbare konsekvensar. Mikael Brun er heller ikkje åleine om ansvaret for konfirmantane i Sogndal. Eg er ikkje overtydd om at vi i eit liberalt samfunn, og i ei open og mangfaldig kyrkje, må halde unge menneske unna ein som tenker annleis ein fleirtalet.