Her blir Patrick-Olof koronatesta. Bak kvar prøve ligg timar med manuelt arbeid på laboratoriet.
Trudde du koronatesten er eit sveip i nasen, inn i ei maskin og så er svaret klart? Bak kvar prøve ligg timevis med manuelt arbeid på laboratoriet.
NYHETER //
Patrick-Olof Hermebäck (24) har kjent på hovudpine, feber, dårleg lukte- og smakssans sidan dagen før. No vil han teste seg før han skal tilbake på jobb.
– Eg tenkjer på kollegaer og deira pårørande, seier Hermebäck, som jobbar med feiing og tilsyn i Bergen brannvesen.
Tek testen på Festplassen
På teststasjonen på Festplassen spaserer han rett inn, utan kø. Han legitimerer seg og følgjer instruksjonane frå Margrethe Norland. Munnbindet går av og vattpinnen går inn.
– Kjempeubehageleg å få noko langt inn i nasen, seier han til BT etterpå og knip auga att.
No skal han heim til Godvik og vente på svar.
Frakta til Haukeland
Ein halvtime seinare blir koronaprøven til Hermebäck og dei andre som har testa seg på Festplassen denne formiddagen, lossa inn i ein kvit varebil. Varebilen køyrer direkte til Haukeland universitetssjukehus, der dei blå boksane blir trilla inn i heisen og ført opp til prøvemottaket.
Går først i køen
På prøvemottaket blir alle koronaprøvane pakka ut og sortert. Dei prøvane som hastar mest, skal først i køen og blir plassert i eit eige stativ. Dette gjeld prøvar av helsepersonell, eller dei som har nokon med påvist korona i familien.
Når prøvane blir skanna, kjem informasjon om hastegrad opp på skjermen. Prøven til Patrick er ikkje i denne kategorien, men blir likevel sendt rett til laboratoriet for analyse.
Fire prøvar blir miksa saman For å spare på testutstyr byrja Haukeland, som det første laboratoriet i Norge, å blande fire og fire prøvar. I staden for å køyre 96 prøvar i maskina om gongen, kan dei då få svar på 384 samstundes. Men om ein slik «pool» med fire prøvar slår positiv ut, må dei køyre dei fire prøvane på ny, kvar for seg, for å finne ut kven som har korona.
Kvar prøve blir rista i ei blandingsmaskin, før bioingeniør Emilie Kristine Bergmann opnar lokket og hentar ut 300 mikroliter frå kvart prøveglas. Dei fire prøvane blir samla i eit mindre glas, som får sitt eige nummer, kopla til dei opphavlege prøvane.
Gjer prøvane klare til analyse Bioingeniør Marie Sekse tek prøven til Patrick og dei andre med til rommet der analysen skal føregå. Først blandar ho prøvane godt i ristemaskin, før ho opnar glasa og plasserer dei sirleg på rekke.
– Mange trur at det berre er å sette prøvane inn i ei maskin og vips, så er det ferdig. Slik er det ikkje, kommenterer bioingeniør Julie Tidemann Vestby.
Bioingeniøren scanner prøvane og sender lista over til pipeteringsrobotoen. Den flytter prøvane frå rør til plate.
Reinsemaskin skil ut RNA Om lag ein halvtime seinare kan Sekse hente prøvane ut og sette dei inn i ei ny maskin. Denne reinsemaskina trekk RNA ut av cellene og virus. Prøverøyret inneheld no arvestoffet til alle virus og bakteriar som finst i prøva, i tillegg til pasienten sitt DNA. Jakta på det unike arvestoffet til koronaviruset startar.
Millionkopiar av arvestoffet Medan reinsemaskina arbeider,
Bioingeniør Julie Tidemann Vestby.
er Sekse i gong med neste steg: å blande reagensmiksen som står for sjølve reaksjonen. Då må ho inn på eit DNA-fritt rom. Med hanskar på blandar ho ingrediensane som sørgjer for at ein bit av arvestoffet til koronaviruset blir kopiert opp i milionar av kopiar. Denne miksen er utvikla lokalt på sjukehuset, og må vere ferskvare kvar gong.
Ved å tilsetje enzym, byggesteinar og små spesialdesigna DNA-trådar, kan ein kopiere opp ein unik del av arvestoffet til koronaviruset, og merke dette med eit lysande molekyl. Denne PCR-metoden er gullstandarden innanfor diagnostikk. To kontrollar er alltid med, for å sjekke at maskina gir riktig svar.
PCR-maskina gir svar
Det er blitt sein ettermiddag når brettet med prøvar er klart til å gå inn i PCR-maskina der sjølve deteksjonen av viruset og dei lysande molekyla føregår. Så kjem svaret: Det er positive prøvar i utvalet.
Positive utslag
I utvalet er det fem raude prikkar. Kvar av desse «poolane», som består av prøvar frå fire ulike personar, må testast på nytt.
Bioingeniøren må dermed inn på lageret og hente ut prøvane som må testast kvar for seg for å identifisere riktig pasient.
Prøvesvaret tikkar inn
Dei fleste prøvane er negative, og her kan testresultata sendast rett ut.
Over 80 prosent av dei som vert testa i Helse Bergen sitt nedslagsfelt får svar innan 24 timar. For Patrick-Olof Hermebäck tek det berre om lag seks timar før han kan lese av svaret på mobilen. Prøven er negativ.
– Eg har hatt nokre spente timar etter at eg tok testen. 2020 har vore eit spesielt år. Pandemi og nedstenging, men aller verst var at vi heldt på å miste ein i familien. Difor hadde det vore kjedeleg å gå inn i adventstida med ein positiv test, seier Hermebäck.