Vil forby fossilbilar i Bergen
Byrådspartiet MDG vil forby fossilbilar i Bergen og fjerne nesten all parkering på Nordnes. Det skal skje innan fire år.
Til og med partiet sjølv kallar resolusjonane dei vedtok under årsmøtet i MDG i Bergen laurdag «radikale».
Ikkje berre vil dei forby fossilbilar innan 2025. Innan 2030 vil dei også innføre eit totalforbod mot all bruk av fossile energikjelder.
– Om vi skal nå klimamåla er det dette som krevst. Vi veit at fossilbilen må vekk, det er ikkje noko vi kan nekte for. Det er eit problem når politikarar seier dei vil nå klimamåla, men ikkje kva det vil krevje, andrekandidat for MDG, Josefine Gjerde.
– Korleis trur du folk i Bergen vil reagere på dette?
– Det er nok mange som er bekymra for korleis kvardagen deira skal gå opp når dei ikkje lenger kan bruke fossilbil. Vi politikarar har eit ansvar for å gjere det mogeleg og gjere det enklare å bruke kollektiv, sykkel eller beina. Bruktbilmarknaden for elbilar har også styrkja seg, seier Gjerde.
For å få gjennomslag må partiet først overtale samarbeidspartnarane i byrådet – Ap, KrF og Venstre. Deretter må dei få minst eit opposisjonsparti med på laget, for å skaffe fleirtal i bystyret.
I tråd med Grønn strategi
Å bli kvitt fossile energikjelder innan 2030 er i tråd med Grønn strategi for Bergen, som allereie har fått bystyrets velsigning. Forskjellen er at det ikkje blir nemnt noko om eit forbod.
– Både Sp, Frp og FNB forsøkjer å halde igjen, men eg trur det tvingar seg fram nye endringar, seier Gjerde.
– Kva straff skal ein få dersom ein bryt forbodet de foreslår?
– Det er ikkje avklart enno, seier Gjerde, men viser til at regjeringa no har gitt grønt lys til såkalla «nullutsleppssoner». Det vil seie at dei opnar for at ein kan nekte fossil- og dieselbilar å køyre i enkelte gater.
Gjerde meiner ein kan bruke straffeutmålinga som blir skissert der til å finne ut kor nivået skal ligge her.
– Ein har rett til å eige ein bil om ein vil. Vil det i det heile vere mogeleg i Bergen om ni år med desse tiltaka?
– Ja, så lenge den er elektrisk.
Vi kan ikkje nekte folk å eige noko, men vi vil ikkje at dei skal ha fossilbilar.
Dersom Bergen skal vere fritt for fossile energikjelder i 2030, vil det mellom anna innebere at alle fly på Flesland må vere elektriske om berre ni år.
– Er det realistisk?
– Eg trur det. Vi sit ikkje på alle løysingane i detalj, men eg føler det er eit miljøparti sin plass å seie at det er her ambisjonsnivået bør ligge. Vi har sett tidlegare at grøn teknologi har utvikla seg raskare enn ein trudde. Eg er optimistisk, men vi har dårleg tid, seier Gjerde.
Vil fjerne parkering
I tillegg til å fjerne fossilbilane heilt, vil partiet gjere Nordnes og Nøstet heilt fri for biltrafikk. Dette betyr mellom anna at all gateparkering vil forsvinne, sett vekk ifrå HC-parkering og parkeringsplassar til bildeleringar.
Dei som bur der skal i staden få prioritert plass og rabatt i parkeringshus i sentrum.
– Dei som verkeleg treng det, skal få kome seg rundt, og det vil framleis vere bildeleparkering. Så ein skal kome seg på Ikea, eller klare å skaffe ein flyttebil. Men vi ønskjer å gi meir av gatearealet til syklande, barn og leikeplassar.