Trur batteriproduksjon kan bli eit «oljeeventyr»
Tolv kommunar i Vestland har meldt seg på i kampen om å få 2000 arbeidsplassar i ein ny batterifabrikk.
adne.lunde@bt.no
Både tunge tradisjonelle industriområde og industrielle nykomarar kastar seg inn i kampen om å få fabrikken Hydro, Equinor og Panasonic planlegg i Noreg.
– Denne fabrikken skal vi berre ha til Vestland. Slik blir Vestland episenteret for det grøne skiftet, seier fylkesordførarar Jon Askeland (Sp).
Han samanliknar det som no skjer med den rolla Stavanger tok då oljeindustrien kom til landet.
Vestland vil no senda eit samla tilbod til industrigigantane som står bak fabrikkplanane, der fylket fører den overordna argumentasjonen for å få fabrikken hit.
Knallhard konkurranse
– Vi kan dette, og det er vi som skal ha denne fabrikken, seier Askeland, vel vitande om knallhard konkurranse frå resten av landet.
Fristen for å melda interesse for fabrikken går ut 28. januar.
I løpet av første halvår skal så verksemdene bak batteriplanane gjera ein forstudie av kvar ein eventuell fabrikk kan byggast.
Tomta må vera byggeklar i 2023, og produksjonsstart er planlagt i 2025.
Til no har Vestland registrert desse håpefulle batteribeilarane:
Askøy kommune som jobbar med tre alternativ.
Bremanger kommune som mellom anna vurderer Holmøyane ved Svelgen.
Fjaler som har industriområdet på Lutelandet.
Lærdal som ser på prosjektet saman med Aurland og Årdal.
Alver og Austrheim som har eit regulert industriområde på Mongstad.
Bjørnafjorden planlegg nytt industriområde i Lyseparken.
Gulen og Masfjorden satsar på Sløvåg og Skipavika.
Kinn kommune vil ha fabrikken til Grønenga like ved Florø.
Kvinnherad spelar inn Husnes.
Sunnfjord saman med Høyanger, Fjaler, Hyllestad og Askvoll vil satsa på Moskog eller andre mogelege alternativ.
Voss herad inviterer fabrikken til industriparken på Istad.
Øygarden vil ha batteriindustri til Kollsnes.
Krava frå industritrioen
Når desse stadane skal gjera seg lekre for batterifabrikantane er det tre hovudkrav dei må innfri: Plass: Dimensjonane er store. Industritomta må vera på 400 dekar med høve til å utvida til 1000 dekar. Området skal ifølgje krava ha plass til ein bygningsmasse på rundt 200.000 kvadratmeter og rundt 20 meters høgde.
Kraft: Fabrikken krev god tilgang på kraft. 100 MW i første fase, med høve til dobling. Folk: I kriteria står det: «Mobilisering av driftsbemanning på ca. 2000 personer direkte ansatte i første fase. Hovedsaklig faglærte operatører, og personell med høyskole/ universitetsutdanning.»
I tillegg blir det lista opp at ein treng mykje kjølevatn, gode transportårer og nærleik til flyplass.
Industrikommunar
To av verksemdene bak fabrikkplanane er alt tungt inne i området. Hydro har sine anlegg i Årdal og på Husnes i Kvinnherad, og begge stadane ønskjer altså fabrikken velkomen.
Jon Askeland (Sp), fylkesordførarar
– Det er avgjerande å vera på tilbodssida og visa at distrikta er attraktive område, særleg dei som har rikeleg tilgang på kraft, sa ordførar i Kvinnherad, Hans Inge Myrvold (Sp), til E24 måndag.
Equinor har sine anlegg på Mongstad i Alver kommune og på Kollsnes i Øygarden. Begge stadane melder seg også på i kampen om å få batterifabrikken.
Manglar areal
Bergen kommune glimrar med sitt fråvær på lista, det same gjer Ullensvang kommune med det tradisjonsrike industrimiljøet i Odda. Begge stadane handlar det om mangel på plass.
BT har tidlegare skrive om problema med å få nok kraft frå dei store kraftverka i indre delar av fylket og ut til dei folkerike områda langs kysten. For fleire av dei som melder interesse kan dette bli eit tema.
Byggja ut kraftframføring
– Vi må heile tida jobba intenst for å byggja ut kraftframføring, og her må det eit taktskifte til og politisk vilje. Samstundes må vi søkja nye og smarte løysingar for å møta kraftbehovet. Her må ein også tenkja utnytting av solenergi og energideling, seier ordførar Trine Lindborg i Bjørnafjorden kommune.
Ho marknadsfører den nye Lyseparken med kort avstand til flypassen og til sentrum av Bergen. Lyseparken er eit nytt industriområdet med grøn profil, like ved nye E39.
Bilparken er på full veg over til batteri. Potensialet i denne bransjen er større enn i hydrogen og vindkraft til saman.
– Brua frå olje og gass Fylkesordføraren er oppteken av at Vestland dreg saman for å få denne etableringa.
– Bilparken er på full veg over til batteri. Potensialet i denne bransjen er større enn i hydrogen og vindkraft til saman. Dette kan vera brua frå olje og gass og inn i det grøne skiftet, seier Askeland.
Vestland må gripa rolla som regional utviklingsaktør, meiner fylkesordføraren.
Fredag møtte han alle ordførarane i Vestland for å diskutera strategi for å få etableringa hit. Vestland vil også pressa på for å få betre kraftforsyning til kystområde.