Skjeletta ramlar ut av Olsens skåp
Gratulerer med ny rektor, Tromsø!
AVGANGEN TIL DAG Rune Olsen som rektor ved Universitetet i Bergen har blitt av det heilt spektakulære slaget. No er spørsmålet korleis Universitetet i Tromsø stiller seg til mannen som etter planen skal tiltre som rektor 1. august.
Denne veka har Bergens Tidende vist korleis Dag Rune Olsen har lova fleire titals millionar til eit forskingssenter i Kina. Førebels har ikkje kinesarane fått ei krone, og no går striden på UiB om kva slags avtale som eigentleg er inngått.
SKULLE UIB BETALE for aktivitetar i Kina eller for eigne tilsette? Viserektor Annelin Eriksen sa det siste då ho og Olsen snakka om saka i universitetsstyret.
«Vi betaler stipendiater hos oss. Det er ikke å sende penger til Kina på den måten, som det virker som du kanskje tenker», svarte ho på spørsmål frå styremedlem Petter Erling Bjørstad.
MEN DAG RUNE OLSEN har vitterleg signert intensjonsavtalar som seier at UiB skal bidra finansielt. Det skulle sendast pengar til Kina. «Jeg ser at jeg svarer upresist der», seier Eriksen når ho blir konfrontert med dette av BT.
Ordet «upresist» er meir enn berre upresist. Det ville vore meir rett av viserektoren å seie «eg sa det motsette til universitetsstyret av det som er sant».
Leiarane ved ein kunnskapsinstitusjon som UiB bør halde seg for gode til å omtale direkte gale opplysningar som «upresist».
DETTE KJEM PÅ TOPPEN av heile saka om det stranda oppkjøpet av Praktikk AS, der tidlegare NHO-topp Tom Knudsen kunne fått inntil 20 millionar for å utvikle ein slags praksisportal.
Framleis slit universitetsstyret med å forstå kva prosjektet eigentleg handla om, og dei har no sett i verk ei ekstern gransking av saka.
I TILLEGG KJEM DET faktum at Dag Rune Olsen plutseleg valde å gå av som rektor etter nyttår. Han grunngav det med «interessekonfliktar» med jobben i Tromsø, noko han tidlegare hadde avvist.
Forskarforbundet meinte at Olsen på dette tidspunktet ikkje lenger hadde styrets tillit som rektor.
OG NO LIGG DET ALTSÅ ein faktura frå Kina, komplett med raud stjerne og det heile, som skaper hovudbry for Universitetet i Bergen. Kva slags avtale var det eigentleg Dag Rune Olsen gjorde med kinesarane om forskingssenteret?
Jo, ein avtale som slår fast at UiB har eit økonomisk ansvar for oppstarten av senteret. Og då rektoratet fekk spørsmålet om dette frå styremedlem Petter Erling Bjørstad, svarte dei det motsette av sanninga.
Kina-saka er alvorleg for Olsen, men ho råkar fleire ved universitetet. Har styret tilstrekkeleg kontroll på kva slags prosjekt Universitetet i Bergen går inn i?
ER SYSTEMET GODT NOK rigga for å kome med kritiske innvendingar, eller er det berre ja-folk og applaus som høyrest i gangane?
No skal universitet velje ny rektor. Den valkampen bør handle om openheit, ryddige prosessar og god forankring. Alt kaoset i kjølvatnet av Dag Rune Olsens avgang skaper sjølvsagt bråk internt i institusjonen.
Det viktigaste er likevel tilliten mellom samfunnet og universitetet.
I TROMSØ VAR Olsens internasjonale nettverk og erfaring ein viktig grunn til at han blei tilsett som rektor. No har BT vist kva som er realiteten i den store Kinasatsinga.
Sakene om Praktikk og om avgangen som rektor er også interessante. Dei viser korleis Olsen ser på pengebruk, rolleforståing og forankring: Sjølve kjernen i kva ein universitetsrektor bør vere god på.
VED UNIVERSITETET I BERGEN er det mange som synst det er heilt greitt at Olsen ikkje er rektor meir. Det skal bli spanande å sjå om han nokon gong tiltrer i Tromsø.