Skuffa over regjeringa
Helseminister Bent Høie sa nei til å stengje store byggeplassar i Bergen. – Eg er skuffa, seier helsebyråd Beate Husa.
Måndag bad byrådet regjeringa om hjelp.
Det sørafrikanske mutantviruset spreier seg i byggebransjen, og smittesporarane har ikkje kontroll. Håpet til byrådet var at regjeringa raskt kunne få stengt ned byggeplassane i heile bergensregionen for å stoppe smitta og gi betre oversikt over utbrotet.
Svaret frå helseministeren var eit blankt nei. Departementet viste til at den strenge forskrifta vi lever under no, ligg fast.
– Men kommunane kan velje å fatte strengare reglar lokalt enn det regjeringa har lagt opp til der. Om Bergen kommune har behov for strengare tiltak, står dei derfor fritt til å vedta dette, var svaret frå helseminister Bent Høie.
Det svaret var langt ifrå det helsebyråden ønskte seg.
– Eg er skuffa over det, seier Husa.
Må innføre forskrift sjølv
No har byrådet mista ein dag, og er nøydd å innføre si eiga forskrift om byggebransjen. Den er venta å bli lagt fram rundt klokka 18.00 tysdag.
– Eg skulle ønskje regjeringa hadde tatt den ballen, og i alle fall gitt ei vurdering. Men eg må jo respektere det, og er i det minste glad for at beskjeden kom tilbake til oss raskt slik at vi kunne gjere den vurderinga, seier Husa.
Helsebyråden meiner den nye forskrifta bør gjelde heile bergensregionen. Viss ikkje fryktar dei at arbeidarane reiser vidare til byggeplassar utanfor kommunegrensa, og også har med seg det sørafrikanske mutantviruset i bagasjen.
Derfor må byrådet også bruke tid på å kontakte omeignskommunane, og bli einige med dei. Deretter må alle dei 12 kommunane vedta forskrifta hos si kriseleiing.
– Vi har rett og slett ikkje hatt tid til å snakke med dei endå. Så vi må ta den ballen opp etter kvart som vi får tilbakemeldinga frå politiet, og i etterkant av byrådet sitt vedtak, seier Husa.
Torsdag skal Bergen kommune i møte med nasjonale helsemyndigheiter for å vurdere om ein skal lette tiltaka, eller halde fram under dagen smittevernregime.
– Eg håpar at det ikkje skal vare lenger enn ut veka, men samtidig er det veldig avhengig av svara vi får dei naeraste dagane, seier Husa.