Dette skal det nye «koronapolitiet» gjere
Regjeringa har bedt Bergen auke innsatsen mot brot på innreisekarantene.
Bergen kommune opprettar sitt eige «koronapoliti», og har tilsett pensjonerte politifolk som smitteverninspektørar.
Dei får som jobb å undersøkje om privatpersonar følgjer karantenereglane.
– Vi er bedt av regjeringa om å i større grad følgje opp karantenebrot som kommune, utover det politiet kan agere på, seier byrådsleiar Roger Valhammer.
Brot på innreisereglar
Spesielt skal kommunen ha fått beskjed frå regjeringa om å følgje opp mogelege brot på karantenereglane ved innreise til Noreg.
– Ja, men det vil òg vere generelt. Det er utfordringar vi har vore opptekne av i lang tid med importsmitte. Vi har eksempel i Noreg og i vår region på at reglane ikkje blir følgt, seier byrådsleiar Valhammer.
Helsebyråd Beate Husa (KrF) seier inspektørane kan kome i ein situasjon der dei melder folk til politiet, eller må be dei om bistand.
– Det er heilt avgjerande at folk overheld karantenen om vi skal stoppe spreiinga av dei muterte virusa, seier Husa.
– Kan dei gå inn i private heimar?
– Dei vil ikkje ha politimyndigheit. Dersom nokon bryt reglane og ikkje innrettar seg etter dei, er det framleis påtalemyndigheit og politi som har ansvar for å følgje opp, seier Valhammer.
Kan melde folk til politiet
Kommunen har mellom anna tilsett ein førsteinspektør som tidlegare har arbeidd med tilsvarande oppgåver i politiet. Han hadde sin første arbeidsdag på onsdag, opplyser beredskapssjef Ivar Lunde.
Oppgåvene til smitteverninspektørane vil vere todelt. Det første blir å gjennomgå listene for folk som sit i innreise- eller smittekarantene, og gjennomføre tilfeldige oppringingar på telefon.
– Vi vil ha ein dialog om korleis karantenen gjennomførast, og forsikre oss om at den gjennomførast i tråd med retningslinjene, seier Lunde.
Ved eventuelle brot kan det også vere aktuelt å gå på tilsyn, opplyser beredskapssjefen.
– Om ein har fått informasjon frå kommunen, og ikkje retter seg etter denne, kan det bli aktuelt å melde til politiet alvorlege karantenebrot, seier Lunde.
Det er ikkje avgjort kor mange som vil bli tilsett i «koronapolitiet».
– Dersom det er ei stor utfordring at folk ikkje overheld karantenereglane, vil vi auke til den kapasiteten som er naudsynt. Dersom vi ser at det ikkje er ei stor utfordring, vil vi ikkje tilsetje så mange, opplyser Lunde.
Språkproblem
Brot på karantenereglane kan skuldast fleire ting, seier Husa. Mellom anna språkproblem.
– Vi kan få opplysningar om dette på ulike måtar. Vi har gjennom kartlegginga om smittesporarane gjer, funne ut at folk som har vore i karantene får nye naerkontaktar, fortel byråden.
Tidlegare har smittevernkontoret og politiet følgt opp dei som har sete i innreiseeller smittekarantene.
Arbeidstilsynet vil framleis ha ansvar for å undersøkje om karantenereglar blir følgt når det gjeld arbeidsplassar.
Det er heilt avgjerande at folk overheld karantenen om vi skal stoppe spreiinga av dei muterte virusa. Beate Husa