Hanne (23) er framleis prega av korona – no får ho hurtighjelp
Før covid gjekk Hanne Morken Henriksen 7-fjellturen, men no blir ho utsliten etter 15 minutt på flatmark.
Eit halvt år etter at Hanne Morken Henriksen fekk korona, er ho framleis tungpusta og søv gjerne 16 timar i strekk. I Hardanger vonar eit tverrfagleg helsesenter å hjelpe Hanne og andre som slit med etterverknader etter covid.
– Litt til, litt til, litt til!
Fysioterapeut Kiri Lovise Njøten pressar Hanne Henriksen
til det ytste. Oppoverbakken på tredemølla blir tyngre og tyngre.
23-åringen er kopla til elektrodar som overvaker hjarterytmen og måler lungekapasiteten.
Lege Arne Gill Haanshuus følgjer med på oksygenmetting og blodtrykk frå sidelinja.
Henriksen pustar tungt bak maska medan skritta slår takfast mot underlaget.
– 20 sekund til, ropar fysioterapeuten.
Etter ni minutt er kraftanstrengelsen over og Henriksen kan få att pusten.
Vondt i heile kroppen
For eit halvt år sidan levde Hanne Henriksen (23) eit aktivt liv med fjellturar og treningssenter fem-seks gongar i veka. Ho kombinerte sjukepleiarstudium med deltidsjobb. Det var seint i seng og tidleg opp.
Men i oktober blei ho smitta av covid-19 via sambuaren sin.
Det byrja med vondt i halsen og forkjøling, smaks- og luktesansen forsvann. Så blei ho langt verre.
– Eg hadde vondt i heile kroppen, saerleg i beina. Det kjentest som om lår og leggar skulle sprengje.
Henriksen har astma, og kjende fleire gongar at ho ikkje fekk puste. Hosten heldt ho vaken om natta.
– Eg trudde at eg skulle døy sånn fire gongar.
Ho var i isolasjon i 35 dagar medan ho venta på å bli symptomfri. Det blei ho aldri. Fire månader etter infeksjonen er ho framleis tungpusta, sjølv om ho går på tre astmamedisinar.
Eksperthjelp i tre dagar
Ho prøver å lese for å ta igjen eksamenane ho gjekk glipp av i haust, men blir fort sliten og kan sove 16 timar i strekk.
På gode dagar kan ho gå