BELTESENGENE FJERNA:
Desse menneska står allereie svaert svakt og er i ein kritisk livssituasjon. Då må ein vere ekstra varsam med bruk av makt.
DEI GAMLE BELTESENGENE forsvinn frå Sandviken sjukehus. Det er ein siger i kampen mot unødvendig tvangsbruk i psykiatrien. Ifølgje ei undersøking utført av VG i 2016, var det 1000 tilfelle av udokumentert beltelegging året før.
Helseminister Bent Høie (H) svarte at det hadde vore «altfor lite styring med bruk av makt overfor syke mennesker».
Likevel har det tatt nesten fem år å endre tilhøva på Sandviken sjukehus. Oppgraderinga har kosta 25 millionar kroner. Det er skremmande kor lite pengar som eigentleg var nødvendig.
FOR TO ÅR SIDAN publiserte Sivilombodsmannen ein knusande rapport om forholda på Sandviken sjukehus.
Då kom det fram at ein pasient hadde lagt fastspent i belte i nesten sju døgn i strekk. Ei veke på isolat blei skildra som vanleg. Sivilombodsmannen meinte at skjermingseininga hadde eit «klart preg av avstraffelse».
Slik skal det ikkje vere. Psykiatrien skal behandle sjuke menneske, ikkje straffe dei. Desse menneska står allereie svaert svakt og er i ein kritisk livssituasjon. Då må ein vere ekstra varsam med bruk av makt.
DET ER GLEDELEG om den siste oppgraderinga bidreg til å gjere slutt på udokumentert og alvorleg tvangsbruk. Dei heilt tomme isolata er vekke. Dei nye sengene har ikkje belte, men det kan takast på ved behov.
Det betyr at ikkje alt automatisk blir betre med nytt interiør. Manglande dokumentasjon handlar meir om leiing og rutinar, enn korleis romma ser ut.
Difor er oppgraderinga av skjermingsavdelingane berre éin del av jobben.
Manglande dokumentasjon handlar meir om leiing og rutinar, enn korleis romma ser ut.
NO MÅ KONTROLLEN med psykiatrien bli betre, slik Høie etterlyste i 2016. Kontrollkommisjonane vert oppnemnt av Statsforvaltaren, men er i realiteten privat drivne forvaltningsorgan. Det må ta slutt.
Kontrollarbeidet må bli meir profesjonelt og betre organisert.
Pasientanes stilling må styrkjast, slik at behandlinga ikkje bryt med menneskerettane deira.