Njåstad overraska og sjokkert over partileiarens avgang
Helge André Njåstad seier han er overraska over at Siv Jensen går av som partileiar.
Siv Jensen annonserte torsdag at ho går av som partileiar i Framstegspartiet etter 15 år etter å ha hasteinnkalla til ein pressekonferanse torsdag ettermiddag.
– Vi blei orientert tidlegare i dag, så vi fekk vite det litt før resten av verda, men ikkje lenge, fortel stortingsrepresentant Helge André Njåstad.
– Kva tenkte då du fekk vite om det?
– Eg fekk sjokk. Det sette heile kjensleregisteret i sving. Først og fremst er det trist, men det er alltid slik når store personlegdomar som har betydd mykje for landet og partiet, går av, seier Njåstad.
Overraska
Frp ligg lågt på målingane, og har dei siste åra slite med konfliktar i lokallaga i både Bergen og Oslo.
Under pressekonferansen avviste Jensen at dette har spelt inn på hennar avgjerd om å trekke seg, og at det er ønskje om å bruke meir tid med familien og hennar nye hund som er årsaka.
– Eg trur ikkje det er nokon andre årsaker enn det. Siv kallar ein spade for ein spade, og vi veit ho er glad i familien sin.
Likevel seier han at han er overraska over at det skjedde i dag.
– Ja, eg blei eigentleg det. Fordi eg har sett på Siv at ho har fått energien tilbake etter ho kom tilbake frå regjering, seier Njåstad.
Ønskjer Listhaug
Jensen råda partiet til å velje Sylvi Listhaug som ny partileiar.
Dette forslaget seier Njåstad at også han stiller seg bak.
– No håpar eg vi får eit samla parti. Det siste vi treng no, er ein leiardebatt, så det er bra at ho kom med eit stort, klart råd, seier Njåstad.
Også Ketil Solvik-Olsen har varsla at han vil halde fram i partileiinga. Kven som faktisk får topposisjonane i partiet blir avgjort på landsmøtet til våren.
Nestleiar Terje Søviknes har arbeidd med Jensen i over 20 år. Han var prega av nyhenda om at ho gjekk av då BT snakka med torsdag kveld.
– Det har vore ein veldig spesiell periode med mykje kjensler. Eg har tross alt arbeidd med Siv sidan slutten av 90-talet, seier han.
Siv Jensen varsla han personleg tidlegare denne veka.
– Eg blei jo lei meg, seier han og skildrar det som ein epoke for partiet er over.
– Trist
Stortingsrepresentant Silje Hjemdal sat på eit fly under pressekonferansen, og oppdaga først at Jensen hadde gått av då ho landa.
– Min første umiddelbare tanke var at det var trist. Det er ingen tvil om at ho har vore ein av Noregs dyktigaste politikarar dei siste tiåra. Innsatsen til Siv er det berre å bøye seg i støvet for, seier ho.
– Vil du støtte Sylvi Listhaug som partileiar?
– Eg meiner spørsmålet er opp til landsmøtet, men akkurat no er ho kanskje den mest opplagde kandidaten, for Ketil (Solvik-Olsen red.anm) har ingen stortingsplass. Det er dei to mest aktuelle namna no.