Emma fekk seg ein støkk då ho såg prioriteringa
Ein feil i Bergen kommune gjorde at nyretransplanterte Emma Tveitnes og andre i høgrisikogruppa kom for langt bak i vaksinekøen.
Måndag orienterte helsebyråd Beate Husa om vaksineringsplanen for Bergen.
I veke 10, frå 8. mars, skal vaksineringa av aldersgruppa 75–79 år starte opp. Veka etter er det 70–74-åringane sin tur.
I slutten av april er turen komen til 65–69-åringane – samstundes som vaksinering av såkalla høgrisikopasientar mellom 18 og 64 år skulle starte opp.
Seks veker etter FHI
Dette fekk nyretransplanterte Emma Helen Tveitnes (34) til å reagere. Ho går på immundempande medisinar etter transplantasjonen i 2018 og er såleis blant dei som har høg risiko for alvorleg forløp dersom ho får covid-19.
Retningslinjene til Folkehelseinstituttet seier at personar i denne høgrisikogruppa skal ha same prioritet som 65–74-åringane i vaksinekøen. Men ifølgje planen til Bergen kommune måtte Tveitnes og andre yngre risikopasientar vente seks veker lenger enn 70-åringane.
– Det er urimeleg, seier Tveitnes.
– Fleire av oss har barn. Alle seier at barn og unge ikkje skal lide under pandemien, men ingen tenkjer på barna våre.
Eitt år i isolasjon
Heilt sidan koronaen kom til Bergen har ho og dottera levd svaert isolert for å unngå smitte. Lykke Emilie Tveitnes Birkenes (4) har hatt lange periodar heime frå barnehagen når smitten har stått på som verst. Då mutantviruset kom, gjekk ingen verken inn eller ut av leilegheita dei bur i på Wergeland.
Småbarnsmora er fortvila over korleis dette rammar dottera, som ikkje lenger har same band til venene i barnehagen.
– Vi kan ikkje ha besøk, ikkje gå på leikeplass eller delta i bursdagar.
Familien har lenge sett fram til at Tveitnes skulle få vaksinen.
– Først fekk vi beskjed om at eg skulle få den i januar. Det gledde vi oss stort til.
Ho blei fortvila då ho leste BT måndag, der Bergen kommune ikkje såg ut til å ville likestille høgrisikogruppa med 70-åringane, slik FHI gjer.
Også Marianne Sundvor, fylkesleiar i Landsforeningen for nyrepasientar og transplanterte (LNT), reagerte. Ho tykker vaksineringa i Noreg går for sakte.
– Organtransplanterte og kronisk nyresjuke er svaert risikoutsett uansett kor gamle vi er, seier Sundvor.
– Dessverre gjort feil
På spørsmål frå BT om kvifor Bergen ikkje følgjer FHIs retningslinjer, svarer helsebyråd Beate Husa (KrF) at kommunen har gjort ein feil.
– Det er dessverre blitt gjort ein feil frå vår side, dei med underliggande sjukdom/tilstand var ikkje korrekt tatt med, seier Husa.
Ho viser til at desse pasientane skal starte vaksinering samstundes som 70–74-åringane i Bergen.
Vi planlegg for vaksinering av høgrisikopasientar i tråd med prioriteringane frå FHI, og har estimert start for denne gruppa i veke tolv. Det har tidlegare vore sagt at vaksineringa av denne gruppa skal starte i veke elleve, men vi har i dag fått informasjon om tildeling av lågare tal dosar enn antatt.
Ho understrekar at det er vaksineleveransane som avgjer tempoet.
– Heilt fantastisk!
– Det er heilt fantastisk. No blei eg glad, seier Tveitnes når BT ringjer tilbake og fortel at kommunen har gjort om på rekkefølgja.
Ho fortel at ho hadde byrja å vurdere adresseendring til ein annan kommune i håp om å få vaksinen tidlegare.
– Dette var ei stor lette, seier Tveitnes på gråten.
For Tveitnes betyr dette at livet snart kan bli langt betre.
– Eg kan møte folk igjen og sleppe å gå rundt med dødsangst.
Ikkje minst er ho glad for at dottera kan feire bursdagen sin med venene og leve som eit vanleg barn.
– Det er forferdeleg at eit heilt år av livet hennar gjekk ut på at ho ikkje kunne leike med andre. Det slit i hjarterota å måtte nekte henne å vere eit barn.