Fart og sjølvtillit
ANMELDT BOK Åshild Moldskred
«Berre hopp» Roman
Det Norske Samlaget
Nyleg kåra eit utval kritikarar «Tonje Glimmerdal» av Maria Parr til den beste, norske barneboka på 2000-talet. «Berre hopp» legg seg i ryggen på den klassiske forteljinga frå Glimmerdalen med god fart og i same stil, sjølv om heltinna ikkje er fullt så tøff som Tonje.
Med eitt høyreapparat i kvart øyre og ei bestevenninne som sviktar, er det sjølvtillit som står øvst på ønskjelista til Ingeborg. Ho har ingen Vardetind å ta salto ifrå, men ein skaterampe å droppe frå og ei badeklippe å dødse frå gjer same nytta: «Du skal finne fire ting som du synest er skikkeleg skumle. Og du skal gjere dei innan eg dimmar om to veker», seier storebror Emil. Dropping og dødsing blir ein del av Ingeborgs sjølvpålagde treningsprogram for å bli tøffare.
Har du vore innom hjå Tonje og Gunnvald, kjenner du deg straks att hjå Ingeborg og dei: Pappa steller heime, mamma er borte på jobb. Den barnevonde Gras-Mathias, den kloke, underfundige bestemora og den svikefulle minigrisen BB: Desse typane dreg du kjensel på. Moldskreds nynorsk har det same parr’ske, friske og saftige preget av prat og seiemåtar frå bygda der Ingeborg bur. Både språk og innhald gjer at boka eignar seg til høgtlesing – både i familien og i klasserommet.
Ingeborg blir både tøffare og klokare. Ein treng to ting her i livet, seier tante Eir til Tonje. Fart og sjølvtillit. Ein treng to ting til, laerer Ingeborg: Empati og sjølvinnsikt. Lesaren får desse erfaringane konsekvenslaust på kjøpet. Berre hopp. Berre les.