Forskinga hans vert konsert
15 år etter han vann Nattjazzprisen, er saksofonist Kjetil Møster tilbake på festivalscenen. Denne gongen som student.
– Når du har vore din eigen sjef i 15 år, er det ikkje så kult at nokon plutseleg skal bedømme deg og gi deg fristar.
Slik beskriv saksofonist Kjetil Møster overgangen frå sjølvstendig musikar til doktorgradsstipendiat.
Forska på samspel
Vi kjenner han kanskje best frå ensemblet Møster! eller bergensbandet Datarock.
Men dei fire siste åra har Kjetil Møster forska på samspel.
Som stipendiat i kunstnerisk utviklingsarbeid på Griegakademiet har han forska på korleis teknologi kan utvide rolla til hans eige instrument, saksofonen. Prosjektet har fått tittelen «Playing the Saxophone».
– Ved hjelp av teknologi kan eg samhandle med fleire typar utøvarar og konsertarrangørar, og bruke andre musikkformer enn eg plar, fortel Møster.
No er bergensmusikaren snart ved vegs ende i prosjektet. Resultatet av det han har jobba med dei siste åra, kjem i konsertform under årets Nattjazz.
– Det er ganske vanleg at denne typen forskingsprosjekt endar i ein konsert. Men eg har skrive ein skriftleg del òg. Den har eg eigentleg vore meir nervøs for enn sjølve konserten, seier han og ler.
Electrophonic
Improviserer på «eksamen»
Publikum som skaffar seg billett til eksamenskonserten på USF Verftet 1. juni kan forvente seg ei variert konsertoppleving.
– Det blir mykje forskjellig lyd og mange deler. Frå det stille til det massive. Frå solo til mitt eige band Møster!. Eg håpar det blir litt altoppslukande.
Stipendiaten håpar òg han klarar å viske ut skiljet mellom publikum og musikarar. Scene vil han helst ikkje ha.
– Viss publikum kjenner at det er dei sjølv som speler, så har eg oppnådd noko.
Utanom det vil ikkje saksofonisten ut med nokon konkret plan for konserten.
– Eg har ikkje heilt landa det endå. Det blir mykje improvisasjon. Men det betyr ikkje at eg ikkje har ein plan. Improvisering er ikkje det same som å ta noko ut av ingenting.
Om konserten byr på ein del overraskingar for både musikarar og publikum, er Møster klar på kva det ikkje kjem til å bli noko av.
– Det blir ikkje ei framføring av poplåtar som folk kjenner igjen frå før.
– Livsomveltande oppleving
Møster peikar på at prosessen dei siste fire åra har vore minst like viktig som konserten som kjem til slutt. Ut av prosjektet har det mellom anna kome tre plater i lag med bandet Møster!.
For albumet «Dust Breathing» hausta dei ein spelemannsnominasjon i kategorien jazz.
– Det ensemblet har eg spelt med gjennom heile perioden. Dei blir ein del av konserten på Nattjazz i lag med fleire andre, fortel Møgster.
Og det er nettopp samspelet med andre trekker fram frå doktorgradsarbeidet. Det er gjennom dei han har latt seg forme dei siste åra. Sjølv kallar han det ei livsomveltande oppleving.
– Eg har ikkje tatt denne utdanninga for å bli betre på saksofon, men eg har i aller høgste grad blitt ein annan musikar. Det er ikkje sikkert at folk merkar det, men eg har fått eit anna syn på det å lage musikk.
Eg har ikkje tatt denne utdanninga for å bli betre på saksofon, men eg har i aller høgste grad blitt ein annan musikar. Kjetil Møster, saksofonist